«Որ արժեքավոր իրադարձություն է, սա փաստ է: Միշտ չէ, որ ընդդիմությունն ու իշխանությունը կարողանում են նման տարաբնույթ կարծիքների պայմաններում աշխատել մինչեւ վերջ եւ հասնել համաձայնության»,-խորհրդարանում լրագրողների հետ զրույցում ասաց ՀՀ ԱԺ փոխխոսնակ Էդուարդ Շարմազանովը՝ անդրադառնալով Ընտրական օրենսգրքի շուրջ «4+4+4» ձեւաչափով քննարկման արդյունքում երեկ ստորագրված հայտարարությանը:
Էդուարդ Շարմազանովը, սակայն, խուսափում է այդ համաձայնությունը «պատմական» որակելուց: Նա գնահատելի է համարում թե ընդդիմության, թե իշխանության կառուցողական մոտեցումը, իսկ քաղհասարակության դիրքորոշման համար ափսոսում է:
Ձեւաչափին մասնակից քաղաքացիական հասարակության ներկայացուցիչները, հիշեցնենք, հրաժարվեցին ստորագրել համաձայնության տակ:
«Հայաստանում քաղաքական մշակույթը գնում է կայացման ճանապարհով: Քաղաքական դեբատները, քաղաքական երկխոսությունը շատ կարեւոր են: Ես համամիտ եմ իմ այն գործընկերների հետ`ժողովրդավարությունը նախեւառաջ երկխոսություն է, երկխոսության արդյունքում կարելի է հասնել ընդհանուր համաձայնության: Այս իմաստով ես դրական եմ գնահատում: Սա նաեւ դրական է առհասարակ Հայաստանի քաղաքական դաշտի համար: Սա լավ օրինակ կլինի ապագայում նաեւ պառլամենտարիզմի համար»,- ասաց նա:
Կարդացեք նաև
Արձագանքելով լրագրողներից մեկի դիտարկմանը, որ կոնսենսուսն իշխանությանը պետք էր, քանի որ ԵՄ-ն գումարներ է տալու ՀՀ իշխանություններին, Էդուարդ Շարմազանովն ասաց, «ԵՄ-ի փողերի հետ ես գործ չունեմ»:
Նելլի ԳՐԻԳՈՐՅԱՆ
