Հունիսի 13-ին Իտալիայում ՀՀ դեսպանության հովանու ներքո և Հռոմի Դանթե Ալիգիերիի ինստիտուտի կազմակերպմամբ տեղի ունեցավ «Դանթեի ընկալումը Հայաստանում» միջոցառումը:
Միջոցառման մասնակիցներին ուղղված ողջույնի իր խոսքում Իտալիայում ՀՀ դեսպան Վիկտորիա Բաղդասարյանը բարձր գնահատեց նմանօրինակ միջոցառումների նախաձեռնումը՝ երկու ժողովուրդների մշակութային համագործակցության խրախուսման համատեքստում: ՀՀ դեսպանը հակիրճ անդրադարձավ հայ գրականության վրա Դանթեի ստեղծագործությունների ունեցած ազդեցությանը:
Միջոցառման բանախոսն էր Վենետիկի Կա՛ֆոսկարի համալսարանի հայագիտության ամբիոնի պրոֆեսոր Սոնա Հարությունյանը, ով ներկայացրեց Մխիթարյան միաբանության կարևոր դեր Դանթեի ստեղծագործությունները հայերեն թարգմանելու և հայկական շրջանակներում տարածելու գործում: Սոնա Հարությունյանն ընդգծեց, որ Հայր Արսեն Բագրատունու թարգմանությունների շնորհիվ հայերը Դանթեի ստեղծագործություններին ավելի վաղ ծանոթացան, քան ասիական երկրները և անգամ եվրոպական շատ երկրներ: Նա հանգամանալից անդրադարձավ այն ազդեցությանը, որ Դանթեի ստեղծագործություններն ունեցել են հայ գրականության վրա 19-րդ դարից մինչ արդի ժամանակները:
Ելույթներով հանդես եկան նաև Կոշենցայի Դանթե Ալիգիերիի ինստիտուտի հանձնաժողովի անդամներ Տերեզինա Չիլիբերտին և Մարիա Քրիստինա Պարիզե Մարտիրանոն: Միջոցառմանը ներկա էին Դանթե Ալիգիերիի ընկերակցության նախագահ Ալեսանդրո Մասին, գրականագետներ և ուսանողներ:
Կարդացեք նաև
ՀՀ ԱԳՆ
