Ինչպես ավելի վաղ հայտնել էինք, Գերմանիայի Բունդեսթագի` Հայոց ցեղասպանությունը ճանաչող բանաձեւն ընդունելու որոշումը չեղարկելու հայց է ներկայացվել Գերմանիայի Սահմանադրական դատարան. հեղինակն Անկարայի թուրք փաստաբան Մելիհ Աքքուրթն է: «Արմենպրես» լրատվական գործակալության մամուլի սրահում այսօր` հունիսի 15-ին, նշյալ հայցի շուրջ դիտարկումներ արեց միջազգային իրավունքի փորձագետ Վլադիմիր Վարդանյանը:
«Հաջողության հասնելու համար անձը պետք է հիմնավորի, որ այդ փաստաթուղթը խախտել է Գերմանիայի սահմանադրությամբ երաշխավորված մի շարք իրավունքներից մեկը: Այս դեպքում նման խնդիր չկա: Բանաձեւը խորհրդարանական է եւ չունի օրենքի մակարդակ, չի կարող խախտել անձի իրավունքները, այդ թվում` թուրք փաստաբանինը, որը նման կերպ փորձում է ուշադրության կենտրոնում պահել հիմնախնդիրը: Թուրք փաստաբանները սպառել են բանաձեւը չեղյալ ճանաչելու նպատակով բոլոր հնարավոր միջոցները: Հայցադիմումի ընդունման փուլում գերմանական դատարանը հստակ կարտահայտի իր դիրքորոշումը»,-ասաց նա:
Խոսելով Բունդեսթագի` Հայոց ցեղասպանությունը դատապարտող փաստաթղթի բովանդակության մասին` Վլադիմիր Վարդանյանը նկատեց, որ դրանում առավելապես խոսվում է Գերմանական կայսրության, այլ ոչ թե ներկայիս Գերմանիայի պատասխանատվության մասին. «Խոսվում է ավելի շատ Գերմանիայի անգործության, քան մեղսակցության մասին: Վտանգավոր եմ համարում այն հանգամանքը, որ պատասխանատվության թիրախը Թուրքիայից տեղափոխվի Գերմանիա, որովհետեւ վերջինս ընդգծել է իր պատասխանատվությունը, բայց չի նշել, որ նա հանցակից է ցեղասպանության կատարմանը»:
Ինչ վերաբերում է կարծիքին, թե Հայաստանն անմիջապես պետք է մշակի Գերմանիայի կողմից Հայոց ցեղասպանության ժխտումը քրեականացնող օրինագծի շրջանառումը Բունդեսթագում, Վարդանյանի խոսքով` համաեվրոպական տիրույթում Հայոց ցեղասպանությունը ժխտողներին պատասխանատվության ենթարկելու համընդհանուր մոտեցում չկա, ինչը կարող է խոչընդոտել նման օրենքների ընդունմանը. «Բայց եվրոպական իրավական տիրույթի շրջանակում մարդատյացության դեմ պայքարի լուրջ գործընթաց է ծավալվել եւ Հայոց ցեղասպանության ժխտումը կարող է անձանց պատասխանատվության ենթարկելու հիմք հանդիսանալ` անգամ համապատասխան օրենքի բացակայության պարագայում»:
Կարդացեք նաև
Լուիզա ՍՈՒՔԻԱՍՅԱՆ
