«Վագա Ֆարմ» ընկերության տնօրեն Վահե Վարսանյանը վիրավորված չէ ՀՀ պաշտպանության փոխնախարար, Պաշտպանության նախարարության նյութատեխնիկական ապահովման դեպարտամենտի պետ Մովսես Հակոբյանի` ՊՆ կարիքների համար ապրանք մատակարարողների հետ
հրավիրված քննարկման ժամանակ իր հասցեին հնչեցրած դիտողությունների և իր հետ «դու»-ով խոսելու համար:
Aravot.am-ի հետ զրույցում Վահե Վարսանյանը փոխանցեց. «Փոխնախարարը հրապարակային ներողություն է խնդրել ինձնից»:
Հիշեցնենք, որ Վահե Վարսանյանի հորդորները անտեսելով` պարոն Հակոբյանը շարունակում էր նրա հետ «դու»-ով խոսել, իսկ երբ պարոն Վարսանյանն օգտագործեց «հա ջան» արտահայտությունը, փոխնախարարը վրդովվեց. «Այդ բառն ինձ համար շատ վիրավորական է, ու կարող է կոպիտ պատասխան տրվել…ես քեզ հայրություն չեմ ճանաչել»:
Վահե Վարսանյանը ՊՆ քննարկման էր գնացել երկու հիմնական խնդրով, որ չհիմնավորված կերպով իր ընկերությունը չներառեն «սեւ ցուցակի» մեջ, ինչն անհնարին է դարձնում կազմակերպության հետագա մասնակցությունը գնումների գործընթացին։ Երկրորդ խնդիրն այն է, որ ՊՆ-ն հրաժարվել էր վճարել Վարսանյանի ընկերությանը մատակարարված ապրանքների դիմաց։
Կարդացեք նաև
Մեզ հետ զրույցում պարոն Վարսանյանն ասաց, որ փոխնախարարը խոստացել է լուծել այս խնդիրները. «10 օր սպասենք, տեսնենք` ոնց են իրադարձությունները զարգանում»:
Պարզաբանելով «սև ցուցակում» հայտնվելու խնդիրը`«Վագա ֆարմ»-ի տնօրենը նշեց. «Սև ցուցակում ներառում է գնումների գործակալությունը: Մեզ համար անհասկանալի էր, թե ինչու է ՊՆ դեպարտամենտը դիմել գնումների գործակալություն: Սակայն քննարկման ժամանակին մեզ ասացին, որ դեպարտամենտը կդիմի գնումների գործակալություն, որ իրենց միջնորդությունն անվավեր ճանաչվի»:
Մեր այն դիտարկմանը`ՊՆ փոխնախարարին վայե՞լ էր նման տոնայնությամբ գործարարների հետ խոսելը, Վահե Վարսանյանը հորդորեց այդ խնդրով դիմել Մովսես Հակոբյանին:
Հարցին`վիրավորված չէ՞ նման վերաբերմունքից, պարոն Վարսանյանը պատասխանեց. «Փոխնախարարը ներողություն է խնդրել իր`«դու» ով խոսելու համար, հարցը սպառվել է»:
Վճարումների մասին պարոն Վահե Վարսանյանը տեղեկացրեց, որ պետք է սպասել 10 օր, քանի որ փոխնախարարը խոստացել է հարցը լուծել:
Տաթև ՀԱՐՈՒԹՅՈՒՆՅԱՆ
