2016թ. հունիսի 2-ին Գերմանիայի խորհրդարանում Հայոց ցեղասպանության ճանաչման բանաձևի ընդունումից հետո Թուրքիայի նախագահ Ռեջեփ Թայիփ Էրդողանը հերթական անգամ սպառնացել էր Թուրքիայում բնակվող Հայաստանի Հանրապետության քաղաքացիներին։ Այդ հայտարարությունից հետո «Ակօս»-ը փորձել է խոսել Թուրքիայում բնակվող Հայաստանի Հանրապետության քաղաքացիների հետ։
Լրատվամիջոցը նշում է, որ բավական դժվար է Թուրքիայում բնակվող Հայաստանի Հանրապետության քաղաքացի գտնել, որը չի խուսափի արտահայտվել նմանատիպ թեմաներով։
Այնուամենայնիվ, Ստամբուլում գտնվել են մարդիկ, որոնք մեծ դժվարությամբ, բայց համաձայնել են արտահայտել իրենց կարծիքը։
Արդեն մեկ տարի այդ քաղաքում իր ամուսնու հետ բնակվող Կարինե Ա.-ն ասել է. «Երբ առաջին անգամ լսեցի նախագահ Էրդողանի խոսքերը, ինքս ինձ ասացի՝ ի՞նչ գործ ունեմ այստեղ, ամենաճիշտն այստեղից գնալն է։ Փոքր-ինչ մտածելուց հետո էլ ասացի՝ ինչո՞ւ գնամ։ Ես ևս իրավունք ունեմ այստեղ ապրել։ 100 տարի առաջ ընտանիքիս բռնի ուժով գաղթեցրել են այս հողերից։ Հորս ընտանիքը Վանից էր, մայրս՝ Սասունից, ստիպված են եղել գաղթել Հայաստան։ Այդքան տարի հետո մենք էլ որոշել ենք այստեղ ապրել, բայց այս անգամ էլ են մեզ սպառնում վտարել այստեղից։ Շատ զավեշտալի իրավիճակ է»։
Կարդացեք նաև
Կարինեն ամոթալի է համարում Պոլսո Հայոց պատրիարքի ընդհանուր փոխանորդ Արամ Աթեշյանի հեղինակած նամակը, որն ուղղված էր նախագահ Էրդողանին։ Կարինեն վստահ է, որ այդ նամակը որևէ կապ չունի հայերի տեսակետի հետ։
