Գյումրու՝ սեպտեմբերի 18-ին կայանալիք ՏԻՄ ընտրություններին ՀՅԴ-ն հանդես կգա սեփական թեկնածուով: Չնայած տարբեր լուրեր էին շրջանառվում այն մասին, որ ՀՅԴ ցուցակի առաջին տեղը զբաղեցնելու է Գյումրու գործող քաղաքապետ Սամվել Բալասանյանը, այնուհետ շատերը համոզված պնդում էին, որ հենց մարզպետ Հովսեփ Սիմոնյանն է գլխավորելու այն, այսօր հայտնի դարձավ, որ առաջին տեղում ճանաչված բժիշկ Աշոտ Կորյունի Կուրղինյանն է: Նա «Գյումրու մոր և մանկան ավստրիական հիվանդանոց» ՓԲԸ գործադիր տնօրենն է, ՀՅԴ Գյումրու «Արտավազդ Ալիխանյան» կոմիտեության անդամ է:
Նկատենք՝ այս կուսակցությունն առաջինն է, որը հրապարկեց համամասնական ցուցակը գլխավորող անձի անունը: Մյուս կուսակցությունները, թեեւ մասնակցելու են ՏԻՄ ընտրություններին, սակայն դեռ մտորումների ու քննարկումների մեջ են: Հիշեցնենք, որ Ընտրական օրենսգրքով այսուհետ հանրապետության երկրորդ ու երրորդ քաղաքներում՝ Գյումրիում ու Վանաձորում, համայնքի ղեկավարի ընտրություններն անցկացվելու է համամասնական համակարգով, այսինքն` Երևանի մոդելով:
Ի նկատի ունենալով այն հանգամանքը, որ բժշկական աշխարհը եւս իր թեկնածուն ունի, որը հարգված, ներկայանալի անձ է, գործարարները նույնպես հավակնում են քաղաքապետի պաշտոնին, բավական հետաքրքիր ընտրական պատկեր կարելի է կանխատեսել:
Լուսանկարը՝ Աշոտ Կուրղինյանի ֆեյսբուքյան էջից
Կարդացեք նաև
Նունե ԱՐԵՎՇԱՏՅԱՆ
