ՀՀ սպորտի եւ երիտասարդության հարցերի նախարար Գաբրիել Ղազարյանն այսօր աշխատանքային այցով մեկնել էր Արագածոտնի մարզ՝ ծանոթանալու հանրակրթական դպրոցներում ֆիզկուլտուրայի դահլիճների վիճակին, գույքային ապահովության մակարդակին եւ առկա մյուս խնդիրներին: Շրջայցին մասնակցեց նաեւ «Առավոտ» օրաթերթի եւ Aravot.am կայքի մարզական նյութերի պատասխանատուն:
Հասկանալի է, բոլոր գյուղերն այցելել հնարավոր չէր: Բայց այն գյուղական համայնքներում, որտեղ եղանք, ընդհանուր պատկերը հիմնականում նույնն էր, ինչ հանրապետության մյուս մարզերում: Ափնայի դպրոցի դահլիճը սեփական ուժերով մասնակի վերանորոգված է, սակայն դահլիճը հեռու բավարար համարվելուց: Այն վերջնական տեսքի բերելու եւ մարզագույքով ապահովելու կարիք ունի: Շենավանի դպրոցի դահլիճի շենքային պայմանները համեմատաբար ավելի լավ են, բայց այստեղ էլ գույքի անհրաժեշտություն կա: Նույն վիճակն է նաեւ Վարդենուտի դպրոցում: Իսկ ահա Արտաշավանի դպրոցի մարզադահլիճը ավերակ է հիշեցնում:
Խնդիրների թվարկումը շարունակելու անհրաժեշտություն չկա, քանի որ, ինչպես ասացինք, պատկերը նույնն է: Ավելացնենք միայն, որ մեր եղած գյուղական դպրոցներում մարզադահլիճները հիմնականում չեն ջեռուցվում եւ ստացվում է, որ տարվա մեծ մասը դրանք պարապության են մատնված:
Կարդացեք նաև
Դպրոցների տնօրենները եւ ֆիզկուլտուրայի ուսուցիչները փաստեցին, որ առանց այդ էլ սառը կլիմայական պայմաններ ունեցող տարածաշրջանում ձմռան ամիսներին ցրտի պատճառով ֆիզկուլտուրայի դահլիճներում դասեր չեն անցկացվում. դրանք փոխարինվում են շախմատով: Իսկ եթե արձանագրենք նաեւ այն, որ ամռան ամիսներին էլ դպրոցներում արձակուրդ է, ստացվում է, որ դպրոցական դահլիճները լավագույն դեպքում աշակերտներին ծառայել կարող են սեպտեմբեր-նոյեմբեր եւ մարտ-մայիս ամիսներին, այն էլ, եթե տնօրենները եւ ֆիզկուլտուրայի ուսուցիչները գիտակցեն ու պատշաճ կարեւորություն տան աճող սերնդի առողջության պահպանման ու ամրապնդման ռազմավարական նշանակություն ունեցող խնդրին: Ի դեպ, Արագածոտնի մարզում մեզ հանդիպեցին նաեւ այդպիսի հանրակրթական դպրոցներ:
Ընդհանուր տպավորությունից ընդհանրապես դուրս էր Աշտարակ քաղաքի թիվ 1 հիմնական դպրոցը, որը տարիներ առաջ հիմնանորոգվել է Լինսիի հիմնադրամի միջոցներով եւ գտնվում է հոգատար տնօրինության ձեռքում: Ֆիզկուլտուրայի երկու դահլիճներն էլ գրեթե կատարյալ վիճակում են, լուսավոր ու տրամադրող ու ծառայում են իրենց նպատակին:
Աշոտ ՀԱԿՈԲՅԱՆ
Հ. Գ. Շրջայցի ավարտին Aravot.am-ը զրուցեց Արագածոտնի մարզպետ Գաբրիել Գյոզալյանի եւ ՀՀ սպորտի եւ երիտասարդության հարցերի նախարար Գաբրիել Ղազարյանի հետ: Նրանց հետ հարցազրույցները՝ քիչ հետո:
