Aravot.am-ի տեղեկություններով «4+4+4» ձեւաչափով Ընտրական օրենսգրքի շուրջ քննարկումները վաղվանից վերսկսվելու են: ՀԱԿ խմբակցության ղեկավար, ձեւաչափի հեղինակներից Լեւոն Զուրաբյանը մեզ հետ զրույցում ասաց, որ դեռ հստակ ոչինչ ասել չի կարող, բայց պատրաստակամություն կա քննարկումները վերսկսելու: Այդ մասին օրերս ասել էր նաեւ Կառավարության աշխատակազմի ղեկավար-նախարար Դավիթ Հարությունյանը:
Մեր տեղեկություններով, մի քանի սկզբունքային հարցերի շուրջ, որոնք պնդում էր ընդդիմությունը, համաձայնությունը մեծամասամբ կայացել է: Այդ առիթով մեր հարցին`Լեւոն Զուրաբյանն ասաց, որ ավելին ասել չի կարող, բանակցություններին չվնասելու համար:
Հետաքրքրվեցինք նաեւ`կա՞ երաշխիք, որ իշխանությունն այս անգամ էլ չի մանեւրի եւ նախորդ քննարկումների դառը փորձը չի կրկնվի: «Մենք հո մանկապարտեզում չե՞նք»,- ասաց Լեւոն Զուրաբյանը:
Aravot.am-ի տեղեկություններով, համաձայնության կայացմանը մեծապես նպաստել է Հայաստանում ԵՄ դեսպան Պյոտր Սվիտալսկին: Միասնական մոտեցում, ըստ մեր տեղեկությունների, կա միասնական փաստաթղթով՝ նույնականացման քարտով քվեարկություն կազմակերպելու եւ մատնահետքերի բազա ստեղծելու հարցում։
Կարդացեք նաև
Համաձայնությունների ամրագրումից հետո, ամենայն հավանականությամբ արտահերթ նիստ կհրավիրվի, Ընտրական օրենսգրքում կարվեն համապատասխան փոփոխությունները: Այնուհետ դոնոր կազմակերպությունները, մասնավորապես ԵՄ-ն, կտրամադրեն նույնականացման քարտերի եւ մատնահետքերի բազա ստեղծելու համար անհրաժեշտ գումարը:
Նելլի ԳՐԻԳՈՐՅԱՆ
