«Այն, ինչ կատարվում է, Մինսկի գործընթացը վերակենդանացնելու համար է, որպեսզի այն գոյություն ունենա որպես քաղաքական անվտանգության երաշխիք: Չեմ կարծում, որ լուրջ հաջողությունների կարելի է հասնել: Առավելագույնը` կհաստատվի հանդիպումը եւ փորձ կարվի մյուս հանդիպումը նշանակել, որպեսզի պահպանվի շփումը»,-«Անդրադարձ» մամուլի ակումբում հունիսի 14-ին ասաց «Կովկաս Ինստիտուտի» տնօրեն, քաղաքագետ Ալեքսանդր Իսկանդարյանը` խոսելով հունիսին սպասվելիք ՀՀ-ի եւ Ադրբեջանի նախագահների հնարավոր հանդիպումից,- «Չեմ կարծում, որ իրական պատերազմի հավանականություն կա, բայց համանախագահները ցանկանում են շարունակել գործընթացը` ինչ որ «ստատուս քվո» ապահովելու համար: Եթե լինի հանդիպում, դա կլինի հենց արդյունքը»:
Իսկանդարյանի համոզմամբ` Ադրբեջանը լուրջ դիմադրելու է շփման գծում մոնիթորինգի մեխանիզմի ներդրմանը. «Ադրբեջանի մոտ հետաքննության մեխանիզմներ ներդնելու ցանկություն չկա: Աշխարհում չկան մարդիկ, որոնք չգիտեն` ով է առաջինը կրակում: Ադրբեջանցիները կրակելու պատճառ ունեն: Եթե ադրբեջանական կողմից կրակոցներ չլինեն, հայկական կողմից էլ չեն լինի»:
Քաղաքագետը չի բացառում, որ նախագահների հանդիպումից հետո ռազմական գործողությունները կվերսկսվեն, բայց չի կարծում, որ դրա վրա անմիջականորեն ազդի հենց նախագահների հանդիպումը:
Անդրադառնալով հայ-ռուսական հարաբերություններին` բանախոսը նշեց, որ Ռուսաստանն իր շահն ունի Ադրբեջանում եւ Հայաստանում եւ դա մշտական ձեւաչափ է. «Հիմա քննարկում են Իրան-Ադրբեջան-ՌԴ ծրագրերը, որոնք ՌԴ-ն շարունակելու է իրականացնել: Այս խնդրին մենք հաճախ ճիշտ չենք նայում: Ինտենսիվ գործակցություն է ընթանում ՀՀ-ի եւ ՌԴ-ի միջեւ` զինտեխնիկայի մատակարարման գործով, բայց ՌԴ-ն միշտ է գործակցելու Ադրբեջանի հետ` որոշ հարցերում ավելի լուրջ, քան մեզ հետ: Մենք ապրելու ենք սրանով, սա միշտ գոյություն է ունենալու: Մենք էլ ունենք համապատասխան հարաբերություններ ՌԴ-ի եւ Ուկրաինայի հետ, որի հետ ՌԴ-ն պատերազմում է: Մի խոսքով` յուրաքանչյուրն իր քաղաքական ծրագիրն ունի»:
Կարդացեք նաև
Լուիզա ՍՈՒՔԻԱՍՅԱՆ
