Հունիսի 9-ին Վարշավայի համալսարանի հնագիտության ինստիտուտում տեղի ունեցավ գիտաժողով` նվիրված հայ-լեհական միջազգային հնագիտական արշավախմբի կողմից 2013-2015թթ. Հայաստանում իրականացված համատեղ պեղումներին և հետազոտություններին:
Գիտաժողովի մասնակիցներին ուղղված իր ողջույնի խոսքում Լեհաստանում ՀՀ դեսպան Էդգար Ղազարյանը կարևորեց գիտության և հետազոտությունների ոլորտում հայ-լեհական համագործակցությունը` վերոնշյալ ծրագիրը համարելով դրա լավագույն օրինակներից մեկը:
Դեսպան Ղազարյանը ՀՀ մշակույթի նախարար Հասմիկ Պողոսյանի անունից «Ներսես Շնորհալի» հուշամեդալ և պատվոգիր հանձնեց արշավախմբի համաղեկավար Քշիշտոֆ Յակուբյակին և արշավախմբի անդամ Մաթեուշ Իսկրային:
Գիտաժողովի ընթացքում հայ և լեհ գիտնականները ներկայացրեցին Հայաստանի Մեծամոր հնավայրի տարածքում իրականացված համատեղ պեղումների և հետազոտությունների արդյունքները: Քննարկվեցին նաև համագործակցության առաջիկա ծրագրերը, որի շրջանակներում 2016թ. մեկնարկելու են հայ-լեհական հնագիտական երկրորդ արշավախմբի աշխատանքները Հայաստանի պատմական մայրաքաղաք Արտաշատի մատույցներում:
Կարդացեք նաև
Հունիսի 11-ին Լեհաստանի Մրագովո թանգարանում ՀՀ մշակույթի նախարարության «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի, ՀՀ ԳԱԱ Հնագիտության և ազգագրության ինստիտուտի, Վարշավայի համալսարանի հնագիտության ինստիտուտի և «Էթնոս» գիտական հետազոտությունների կենտրոնի համատեղ ջանքերով պաշտոնապես բացվեց Հայաստանի պատմամշակութային ժառանգությանը նվիրված ժամանակավոր ցուցահանդես, որտեղ ներկայացված են հայ-լեհական արշավախմբի աշխատանքների արդյունքները, ինչպես նաև Հայաստանի պատմամշակութային և հնագիտական վայրերը:
Ցուցահանդեսի բացման արարողությանը ներկա էին Լեհաստանում ՀՀ դեսպան Էդգար Ղազարյանը, Մրագովոյի քաղաքապետ Օտոլիա Աննա Սիեմիենիչը, ՀՀ մշակույթի նախարարության «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի գիտական աշխատանքների գծով տնօրենի տեղակալ, հայ-լեհական հնագիտական արշավախմբի համաղեկավար Աշոտ Փիլիպոսյանը, Վարշավայի համալսարանի հնագիտության ինստիտուտի տնօրեն Քշիշտոֆ Յոկուբյակը, գիտաշխատողներ, արվեստի և կրթության ոլորտի ներկայացուցիչներ:
Ցուցադրությունը կշարունակվի երկու ամիս, որից հետո այն կկազմակերպվի Վարշավայում և Լեհաստանի այլ քաղաքներում:
ՀՀ ԱԳՆ
