88 «կողմ», 15 «դեմ» եւ 14 «ձեռնպահ» ձայների հարաբերակցությամբ՝ այսօր հրավիրված արտահերթ նիստում խորհրդարանն ընդունեց 2015 թվականի պետական բյուջեի կատարողականը: Այն խորհրդարանում քննարկվել էր անցած շաբաթ կայացած քառօրյա նիստում:
Հիշեցնենք, անցյալ տարվա կատարողականին հայտարարել էր, որ «կողմ» է քվեարկելու միայն ՀՀԿ խմբակցությունը: «ՀԱԿ», «Ժառանգություն» եւ ՕԵԿ խմբակցությունները հայտարարել էին, որ «դեմ» են քվեարկելու, ԲՀԿ-ն եւ ՀՅԴ-ն`«ձեռնպահ»: ՀՅԴ-ն, ի դեպ, 2015-ի բյուջեին «դեմ» էր քվեարկել: Սակայն, դատելով, «կողմ» քվեարկածների քանակից, ընդդիմադիր խմբակցություններից ոմանք, ի հեճուկս խմբակցությունների որոշման, «կողմ» են քվեարկել:
Մինչ կատարողականի քվեարկությունը ՀԱԿ խմբակցության ղեկավար Լեւոն Զուրաբյանն առաջարկեց վերանայել նաեւ 2016 թվականի բյուջեն: Ըստ պատգամավորի, բյուջեի ընդունումից հետո առաջնահերթություններ են փոխվել, ուստի, տրամաբանական է, որ արտահերթ նիստով վերանայվի նաեւ երկրի գլխավոր փաստաթուղթը: Իր խոսքը պատգամավորն ուղղում էր դահլիճում նստած վարչապետին եւ կառավարության անդամներին:
Նիստը նախագահող ԱԺ նախագահ Գալուստ Սահակյանը պատգամավորին ասաց, որ քվեարկության ընթացքում կառավարությունը չի կարող պատասխանել, ուստի, ավելի ուշ կարձագանքեն հարցադրմանը:
Կարդացեք նաև
Նելլի ԳՐԻԳՈՐՅԱՆ
