Ինչպես արդեն տեղեկացրել ենք, պաշտպանության նախարարությունում հունիսի 10-ին կազմակերպվել էր ՊՆ կարիքների համար ապրանքների մատակարարման, աշխատանքների եւ ծառայությունների մատուցման մրցույթների հնարավոր մասնակիցների հավաք հանդիպում:
Հանդիպման ընթացքում մատակարարները հնարավորություն ունեցան իրենց հարցերն ուղղել պաշտպանության նախարարության ներկայացուցիչներին:
«Մենք ունենք կնքած պայմանագիր, այն խառը օրերին շատ շտապ զանգեցին, պահանջեցին ստերիլ ձեռնոցներ օպերացիաների համար: Բոլորս հասկանում ենք, ինձ չի հետաքրքրում ժամանակացույց, դա կատարել ենք: Մինչեւ հիմա ես չունեմ ժամանակացույց, որ իմանամ, թե երբ եմ մատակարարում, եւ բացի դրանից խնդիրն այն է, որ չեն ստորագրում մեր ակտը, ասում են, որ գրված է հատ, բայց քանի որ մեզ պետք է զույգ մենք հասկանում ենք զույգ»,- ասաց «Լեւոն եւ Լամարա» դեղատների ցանցի տնօրեն Գեղամ Մոսինյանը:
Կարդացեք նաև
ՊՆ փոխնախարար Մովսես Հակոբյանը ասաց, որ մատակարարի խոսքից եզրակացնում է, որ ինքն էլ է անփույթ եղել: Գեղամ Մոսինյանը պատասխանեց, որ ինքն անփույթ չի եղել, այլ դեպարտամենտը:
«Այն եզրերը, այն խոսքերը, որ Դուք հնչեցնում եք՝ պատերազմը սկսեց, անհրաժեշտ էր հապճեպ մատակարարել … բանակն ունի համապատասխան պահուստներ, որոնք ապահովում են մեր բանակին ամբողջ ծավալով, թիվը չեմ ասի, թե ինչքան ժամանակ: Նա, ով Ձեզնից պատվիրել է, ինքն էլ վճարելու է»:
Ամի ՉԻՉԱԿՅԱՆ
