Հունիսի 10-ի կեսգիշերին Իջեւանի տարածաշրջանի «Բենտոնիտ» գործարանի մոտ փլուզվել է «Քարավարտ» ՍՊԸ-ի ՀԷԿ-ի պատնեշը, որի հետեւանքով զոհվել է այդ ընկերության աշխատող, Իջեւանի տարածաշրջանի Դիտավան գյուղի բնակիչ, 1973թ. ծնված Վարուժան Գաբրիելյանը:
Նրա դին Աղստեւ գետում հայտնաբերվել է առավոտյան ժամը 9-ի սահմաններում, ՀԷԿ-ից բավական հեռու: Դիտավան համայնքի ղեկավար Հակոբ Սարիբեկյանն ասաց, որ ինքը՝ համագյուղացիների հետ, փրկարարների պահանջով գիշերը դադարեցրել է Վ. Գաբրիելյանի որոնումները: Նա խոսքերով՝ վարարած Աղստեւ գետով հսկայական քանակի ջուր էր հոսում: Գյուղապետը Վարուժան Գաբրիելյանի մարմինը գետից հանելու գործում շեշտեց Հայաստանի փրկարար ծառայության Դիլիջանի հրշեջ-փրկարարական ջոկատի հրամանատար, փոխգնդապետ Կորյուն Փիրումյանի դերը, ով համարձակ գործողություններ է կատարել:
Հակոբ Սարիբեկյանը նշեց, որ դիտավանցու դին հայտնաբերել են Այգեհովիտ գյուղի տարածքում, Ադրբեջանի սահմանից մոտ 500 մ հեռավորությամբ: Նա ասաց, որ Վարուժան Գաբրիելյանը մի տղա եւ մի աղջիկ ունի, տղան հիմա գտնվում է Ռուսաստանում, շուտով կվերադառնա Դիտավան: Ընտանիքի սոցիալական վիճակի մասին հարցին ի պատասխան գյուղապետն ասաց, որ սոցիալապես ապահով ընտանիքի անդամը ՀԷԿ-ում աշխատելու չէր գնա:
Կարդացեք նաև
Նա ասաց, որ «Քարավարտ» ՍՊԸ-ն ՀԷԿ-ի աշխատանքի հետ կապված Դիտավանի գյուղապետարանի հետ 3 տարի առաջ պայմանագիր է կնքել, սակայն 10 օր առաջ է սկսել ՀԷԿ-ը գործարկել:
Իջեւան քաղաքում, մի քանի աղբյուրներից տեղեկացանք, որ հիշյալ ՀԷԿ-ը փաստացի պատկանում է ընդդիմադիր «Ազատ դեմոկրատներ» կուսակցության նախագահ, ԱԺ պատգամավոր Խաչիկ Քոքոբելյանին, ով ծնունդով Աչաջուր գյուղից է: Դիտավանի գյուղապետն ասաց, որ «Քարավարտ» ընկերության տնօրենի անունը Արթուր է, իր տվյալներով՝ ընկերությունը գրանցված է Արթիկում: Հ. Սարիբեկյանի խոսքերով՝ ասում են, որ ՀԷԿ-ի տերը Խաչիկ Քոքոբելյանն է, սակայն ինքը չգիտի՝ նա սեփականատե՞ր է, թե՝ ոչ:
Ըստ պետական ռեգիստրի, ՀԷԿ-ը պատկանում է ԱԺ պատգամավոր Խաչատուր Քոքոբելյանի որդուն՝ Սեւադա Քոքոբելյանին։
Ոսկան ՍԱՐԳՍՅԱՆ
