Քրիստոնեական դաստիարակության կենտրոնի երևանյան գրասենյակում հունիսի 10-ին մեկնարկեց կլոր սեղան-քննարկում` «Հայաստանում երեխաների այլընտրանքային խնամքի, ընտանիքի աջակցության և ներառական կրթական ծառայությունների ընդհանուր գնահատում» խորագրով: Քննարկմանը մասնակցում էին ԱԺ պատգամավորներ, ՀՀ կրթության և գիտության, աշխատանքի և սոցիալական հարցերի, արդարադատության, առողջապահության նախարարությունների, ոստիկանության, Երևանի քաղաքապետարանի, ոլորտում աշխատանքներ ծավալող միջազգային և հասարակական կազմակերպությունների ներկայացուցիչներ:
«Մենք հավաքել ենք գերատեսչությունների, կառույցների, կազմակերպությունների ներկայացուցիչներին, որպեսզի միասին քննարկենք, թե ինչ փորձառություն է կուտակվել դաստիարակության, կրթության, պաշտպանության, խնամքի խնդիրների վերաբերյալ: Հասկանանք, թե ով ինչ փորձառություն ունի, ինչ կարիքներ կան, որոնց շուրջ կարելի է մտածել, ծրագրեր կազմել և աշխատանք տանել»,-ասաց Քրիստոնեական դաստիարակության կենտրոնի տնօրեն տեր Վարդան եպիսկոպոս Նավասարդյանը:
Նա հիշեցրեց, որ Հայ Առաքելական եկեղեցին, ՔԴԿ-ն և Հայաստանում ՄԱԿ-ի մանկական հիմնադրամը համագործակցության հուշագիր են ստորագրել, և երկու տարվա ընթացքում իրականացրել են փոքրիկ ծրագրեր:
Քննարկումներն ընթացան երեք ուղղություններով` ընտանիքների աջակցություն, ֆիզիկական և հոգևոր առողջություն, բռնության դեմ պայքար:
Կարդացեք նաև
«Յուրաքանչյուր երեխա նոր մագաղաթ է, և հնարավորություն՝ բարելավելու աշխարհը և այս երկիրը: Մենք ներկայացնում ենք տարբեր հաստատություններ և կազմակերպություններ, բայց մեկ բան բոլորիս միավորում է` ունենք նույն գաղափարը, որ առանց երեխաների ապագա չկա: Հայկական պետության ապագան մեծապես պայմանավորված է նրանով, թե ինչպես ենք մենք այսօր վերաբերվում երեխաներին»,- իր ելույթում նշեց Հայաստանում ՄԱԿ-ի մանկական հիմնադրամի ներկայացուցիչ Տանյա Ռադոչայը:
Նրա համոզմամբ` որպեսզի Հայաստանը լինի հզոր և բարգավաճ երկիր, մենք ունենք յուրաքանչյուր երեխայի կարիքը: «Յուրաքանչյուր երեխայի պետք է զարգանալու և իր ներուժն ամբողջապես իրացնելու հնարավորություն ընձեռվի: Այդուհանդերձ, այս պահին Հայաստանում կան երեխաներ, որոնք չեն կարող ամբողջապես իրացնել իրենց ներուժը: Երեխաների մեկ երրորդն ապրում է աղքատության մեջ»,-ասաց Տանյա Ռադոչայը:
Ռոզա ԳՐԻԳՈՐՅԱՆ
