Համացանցում հայտարարություն է տարածվել, որ հունիսի 20-ից մինչեւ հուլիսի 10-ը Հաղարծին գյուղի անտառներում, Իջեւանի տարածաշրջանի Աչաջուր գյուղում գտնվող Մակարավանքում կատարվելու են Շավարշ Վարդանյանի «Երկար վերադարձ» ֆիլմի նկարահանումները: Հայ-ֆրանսիական արտադրության, արցախյան պատերազմի մասին պատմող կինոնկարի զանգվածային տեսարաններում նկարահանվելու համար պահանջվում են Իջեւանի տարածաշրջանի բնակիչ 20-65 տարեկան տղամարդիկ, 35 տարեկանից բարձր կանայք: Նրանք վարձատրվելու են:
Այս տարվա մարտի վերջին, ապրիլի սկզբին Իջեւանի տարածաշրջանի Խաշթառակ եւ Լուսահովիտ գյուղերի տարածքում ռեժիսոր Ալբերտ Մկրտչյանի որդին՝ Մհեր Մկրտչյանը արցախյան պատերազմի մասին ֆիլմ էր նկարահանում եւ կինոնկարի զանգվածային տեսարանների նկարահանումներում ընդգրկեց Իջեւանի տարածաշրջանի գյուղերի բնակիչների: Վերջիններս մեզ ասել են, որ իրենց խաղացած դերի համար օրական ստացել են 5 հազար դրամ:
Տավուշի մարզի բնակչության շրջանում գործազրկությունը մեծ է, գյուղատնտեսությունից ստացվող եկամուտները մեծ չեն: Զանգվածային տեսարաններում նկարահանվելը հանապազօրյա հացի հարց է լուծում:
Ոսկան ՍԱՐԳՍՅԱՆ
