Մայիսի 28-30-ը Տիրանայում կայացել է ՆԱՏՕ-ր Խորհրդարանական վեհաժողովի գարնանային նստաշրջանը: Նստաշրջանի ընթացքում քննարկվել է նաեւ ԼՂՀ հարցը: Այսօր հրավիրված մամուլի ասուլիսում, ՆԱՏՕ-ի ԽՎ-ի հայաստանյան պատվիրակության ղեկավար, ՀՀԿ խմբակցության պատգամավոր Կորյուն Նահապետյանն ասել է, որ մինչեւ նստաշրջանի սկսելը, ՆԱՏՕ-ի գլխավոր քարտուղարը նամակով դիմել է Հայաստանի եւ Ադրբեջանի պատվիրակություններին`առաջարկելով նստաշրջանում քննարկել ԼՂ հարցը:
ՆԱՏՕ-ի գլխավոր քարտուղարի նամակում նշված է եղել, որ խնդիրը Հայաստանի եւ Ադրբեջանի միջեւ է: Հայաստանցի պատվիրակները դա շատ մտահոգիչ են համարում:
«Մեր պատվիրակությունը նշել էր, որ նպատակահարմար չենք գտնում հարցի քննարկումը, քանի որ կա միակ գործող արդյունավետ համաձայնեցված ձեւաչափ՝ ԵԱՀԿ Մինսկի խումբ: Մնացած հարթակներում հարցի հատուկ քննարկման առարկա դարձնելը չի բխում հակամարտության կարգավորման շահերից»,- ՆԱՏՕ-ում պատասխանել են հայկական պատվիրակության անդամները:
Չնայած հայկական կողմի առարկություններին, քաղաքական հարցերի հանձնաժողովի նիստը նախագահողը, օրակարգի հաստատման ժամանակ հայտարարել է, որ հայկական եւ ադրբեջանական պատվիրակությունների ղեկավարներին հնարավորություն է տրվելու ԼՂՀ խնդրի վերաբերյալ մինչեւ հինգ րոպե տեւողությամբ հայտարարությամբ հանդես գալ:
Կարդացեք նաև
Ադրբեջանի պատվիրակության ղեկավարը կրկնել է Հայաստանի կողմից «օկուպացված» տարածքների հայտնի թեզը ու իբրեւ հետեւանք սանձազերծել է ապրիլյան քառօրյա պատերազմը: Հայկական կողմն էլ իր հակափաստարկներն է ներկայացրել`ապացուցելով նաեւ, որ ապրիլյան պատերազմի սանձազերծողը Ադրբեջանն է եղել:
Ներկայացվել են նաեւ Ադրբեջանի կողմից միջազգային մարդասիրական նորմերի խախտումները, վայրագությունները, խոշտանգումները, հիշատակում է եղել Ռամիլ Սաֆարովի դեպքին, ներկայացվել է Ադրբեջանում տիրող իրավիճակը՝ մարդու իրավունքների, ժողովրդավարության առումով, նավթի եկամուտներով ձեռք բերված սպառազինության մասին է խոսվել: Վերահաստատվել է հայկական կողմի կամքը` հակամարտության խաղաղ կարգավորման մասով:
Ադրբեջանցի պատվիրակները կանոնակարգային հինգ րոպե հայտարարությամբ չեն սահմանափակվել, փորձել են հարցերով քննարկման առարկա դարձնել ԼՂՀ խնդիրը: Դահլիճում անգամ կրքեր են բորբոքվել, սակայն, հայկական պատվիրակությանը հաջողվել է ներկաներին վերադարձնել նիստի օրակարգ`կանխելով ԼՂՀ հարցի անհարկի քննարկումները:
Նելլի ԳՐԻԳՈՐՅԱՆ
