Ազգագրագետ Հրանուշ Խառատյանն, անդրադառնալով Պոլսո Հայոց պատրիարքի ընդհանուր փոխանորդ Արամ արքեպիսկոպոս Աթեշյանի`Թուրքիայի նախագահ Ռեջեփ Թայիփ Էրդողանին ուղղված նամակին, նշեց, որ պատրիարքարանը դարձել է գործիք Թուրքիայի իշխանության ձեռքին:
«Թուրքիայում մեր բոլոր պատրիարքներն էլ եղել են ծանր վիճակում, միշտ եղել են թիրախ: Բայց պատրիարքի անձը և գործը նույնպես զգալի դեր են խաղացել: Այնինչ, դատելով Արամ Աթեշյանի` Պոլսո պատրիարքի փոխանորդ ընտրվելու պահից նրա վարած քաղաքականությունից, պատրիարքարանը դարձել է գործիք Թուրքիայի իշխանության ձեռքին: Նա այրում է բոլոր կամուրջները թրքահայության հետ թե՛ որպես անձ, թե՛ որպես կառույցի ղեկավար»,- «Հայելի» ակումբում հունիսի 9-ին հրավիրված մամուլի ասուլիսի ընթացքում ասաց Հրանուշ Խառատյանը:
Ազգագրագետը վստահ է` Արամ արքեպիսկոպոս Աթեշյանն իր այս քայլով հարվածի տակ է դնում Թուրքիայում բնակվող հայերի մի զգալի հատվածին, որը չի ցավում Բունդեսթագի կողմից Ցեղասպանության ընդունման բանաձևի կապակցությամբ: «Արամ Աթեշյանն այնպիսի ծանր վիճակում է, որ այլ ելք չունի, քան քաջություն գտնել և հրաժարվել փոխանորդի աթոռից»,- նշեց Հրանուշ Խառատյանը:
Կոմիտաս վարդապետ Հովնանյանն էլ նշեց, որ չի արդարացնում Արամ արքեպիսկոպոս Աթեշյանի քայլը, բայց հավելեց. «Այսպիսի լարվածության ժամանակ թրքահայության պատասխանատուն, ըստ իս, փորձում է ինչ-որ լուծում տալ` անվտանգության մեջ պահելու այնտեղ ապրող հայերին: Այստեղ նստած կարող ենք դատապարտել ամեն ինչ և ամենքին, որովհետև մեր կյանքը անվտանգության մեջ է: Իսկ Աթեշյանն այդ քայլով փորձում էր մեղմացնել թուրքերի ատելությունը` պայմանավորված Բունդեսթագի որոշմամբ»:
Կարդացեք նաև
«Նրան ստիպել են, որ նման հայտարարություն անի»,- հավելեց Կոմիտաս վարդապետը:
Ռոզա ԳՐԻԳՈՐՅԱՆ
Լուսանկարը` «Հայելի» ակումբի
