Մուսուլմանների ամենագլխավոր տոնի՝ Ռամադանի առիթով Ադրբեջանի նախագահ Իլհամ Ալիևն ընդունել է այդ երկրում դիվանագիտական առաքելություն իրականացնող մուսուլման դեսպաններին։ Այս մասին տեղեկացնում է թուրքական «Անադոլու» լրատվական գործակալությունը։
Մուսուլման դեսպանների հետ կայացած հանդիպման ժամանակ Ալիևը կարևորել է 2016թ. ապրիլին Ստամբուլում կայացած «Իսլամական համագործակցություն» կազմակերպության` Լեռնային Ղարաբաղի հակամարտության վերաբերյալ ընդունված որոշումը։ Ադրբեջանի նախագահը շնորհակալություն է հայտնել մուսուլման երկրների դեսպաններին, որոնք Արցախի հակամարտության շրջանակներում պաշտպանում են Ադրբեջանին և քննադատում Հայաստանի Հանրապետությանը։
Նախագահ Ալիևը մեղադրել է Հայաստանին՝ Արցախի հակամարտությանը կրոնական երանգ հաղորդելու համար. «Հայաստանի ղեկավարությունն եվրոպական երկրներին մշտապես սխալ տեղեկություններ է հաղորդում, միևնույն ժամանակ, հակամարտությունը փորձում է կրոնական հարթություն տեղափոխել։ Շատ անգամ ասում են, թե մահմեդական 3 երկրի հարևանությամբ պաշտպանում են քրիստոնեական արժեքները։ Սա մեծ կեղծավորություն է։ Դուք էլ գիտեք, որ մեր երկրում երբեք կրոնական և ազգային բախումներ տեղի չեն ունեցել»։
Ալիևն ասել է նաև, որ Հայաստանը թշնամական վերաբերմունք է ցուցաբերում մուսուլմանական երկրների հանդեպ։
