2016թ. հունիսի 2-ին Գերմանիայի Բունդեսթագում Հայոց ցեղասպանության ճանաչման և դատապարտման մասին բանաձևի ընդունումից հետո նմանատիպ բանաձևեր են հայտնվում այլ պետությունների, կամ դրանց ենթակայությամբ գործող ինքնավար շրջանների և տեղական խորհրդարանների օրակարգում։ Այս մասին հաղորդում է թուրքական «Աքշամ» պարբերականը։
Հայոց ցեղասպանության դատապարտման մասին բանաձևն այս անգամ քվեարկության է դրվել Իսպանիայի ենթակայությամբ գործող 17 ինքնավար համայնքների՝ այդ թվում երկրի հյուսիս-արևմտյան Գալիսիայի ինքնավար համայնքի խորհրդարանում։
Այս անգամ սակայն, բանաձևն այդ խորհրդարաններ ներկայացրած ուժերը չեն կարողացել համապատասխան քվեներ ապահովել, որպեսզի օրենսդիր այդ մարմինները նույնպես դատապարտեն հայ ժողովրդի հանդեպ գործած անմարդկային ոճիրը։
Հայոց ցեղասպանության ճանաչման մասին բանաձևը Գալիսիայի ինքնավար համայնքի խորհրդարանում էր հայտնվել ապրիլի 25-ին: Երեկ տեղի ունեցած քվեարկության ժամանակ նախագիծը մերժվել է ձայների 32 կողմ, 38 դեմ հարաբերակցությամբ։ Այս իրադարձությանն անդրադարձել է Իսպանիայում Թուրքիայի արտակարգ և լիազոր դեսպան Օմեր Օնհոնը. «Գալիսիայի խորհրդարանը չմնաց հայկական պնդումների միակողմանի ազդեցության տակ և արդարացի որոշում կայացրեց»։
Կարդացեք նաև
Հիշեցնենք նաև, որ 2015թ. մայիսին Իսպանիայի խորհրդարան ներկայացվեց Հայոց ցեղասպանության ճանաչման մասին նախագիծ, որի քվեարկության ժամանակ ձայները բաշխվեցին հետևյալ կերպ՝ 130 դեմ, 68 ձեռնպահ և 14 կողմ։
