ՀԱԿ խմբակցության քարտուղար Արամ Մանուկյանը ԱԺ-կառավարություն հարցուպատասխանի ժամանակ գյուղնախարարին հարց ուղղեց. «Լրանում է 1 տարին՝ մարդիկ խաղողի հանձնած բերքի դիմաց գումարները չեն ստացել: Վարկերի տակ են եղել՝ չեն կարողացել մուծել: Կառավարությունը խոստումներ է տվել, որ կօգնի՝ չի օգնել: Արդյունքում՝ բավականաչափ ծանոթներ ունեմ, որ ուղղակի ոչնչացրել են խաղողի այգիները»:
Նա նաեւ կարկուտից հետաքրքրվեց, որը մեծ վնաս է տվել առնվազն 4-5 մարզում: Նա հիշեցրեց, որ գիտությունը զարգացել է, կարկուտ են ցրում սարքերը, մեզ մոտ կրակում են, բայց՝ ոչ արդյունավետ:
Գյուղնախարար Սերգո Կարապետյանն ասաց, որ առաջին անգամ չէ, որ այս ամիսներին կարկտահարություն է լինում. «Արմավիրի մարզի 172 հակակարկտային կայաններին ավելացել են նաեւ 18 կայաններ, որոնք արդեն տեղադրվել են: Գյուղացիական տնտեսությունները բարձրացրել են վարկերի հարցը: Վարչապետի հանձնարարությունը կա, առաջիկայում մարզպետարանները կներկայացնեն ցուցակները, որ ԿԲ-ի, բանկերի միջոցով վարկերի հարցը լուծվի: Հաստատ համոզված եղեք, որ վնասները այդքան մեծ ծավալների չեն: 45 համայնքներում է կարկուտ տեղացել, բայց վնասվել են հիմնականում Արմավիրի մարզի 4 համայնքներ, Կոտայքի մարզի 7 համայնքներ Լոռու մարզի 3 համայնքներ, Տավուշի մարզի 4 համայնքներ: Վնասի չափը տարբեր է՝ 20-70 տոկոս, չի կարելի տեղայնացնել ամբողջ հանրապետության մակարդակով»:
Հռիփսիմե ՋԵԲԵՋՅԱՆ
