«Ուրախալի էր կիրակի օրը հետեւել այն իրավիճակին, որը տեղի էր ունենում Ստեփանակերտում` Սամվել Բաբայանի այցի ժամանակ: Իսկապես մեծ բազմություն էր եկել նրան դիմավորելու»,-ԼՂՀ ՊԲ նախկին հրամանատար Սամվել Բաբայանի` Արցախ այցն այսպես է գնահատում ՀՀ ԱԺ պատգամավոր Թեւան Պողոսյանը:
«Ուրախություն էի ապրում, երբ տեսնում էր, որ մարդիկ նրան այդպես են դիմավորում, հետը քայլում, ինքնակազմակերպվում, փորձում պահանջ ձեւավորել: Դա նշանակում է, որ Արցախում կա ժողովրդավարություն եւ միտք արտահայտելու ազատություն»,-հունիսի 8-ին «Տեսակետ» մամուլի ակումբում ասաց Թեւան Պողոսյանը:
Նրա բնորոշմամբ` Սամվել Բաբայանը դեռ Հայաստան չհասած` նրա այցը քաղաքականացվեց. «Եկեք դա որպես հայի վերադարձ դիտարկենք, մենք անվտանգության կարեւոր խնդիրներ ունենք լուծելու: Ցանկացած հայի վերադարձ պետք է ողջունել: Սամվել Բաբայանն անգամ 2013թ.-ին էր նամակով դիմել իշխանություններին, նշանակում է` նա սրտացավ է»:
Ինչ վերաբերում է արցախցիների` Բաբայանին Արցախի պաշտպանության նախարար նշանակելու պահանջին, Թեւան Պողոսյանի խոսքով. «Պահանջները պետք է քննարկել սեղանի շուրջ նստելով, ոչ թե իրարից նեղանալով կամ իրար հետ մամուլով շփվելով»:
Կարդացեք նաև
Պողոսյանն անդրադարձավ նաեւ ԼՂՀ ՊԲ հրամանատար Լեւոն Մնացականյանի` Սամվել Բաբայանի այցի շուրջ հնչեցրած տեսակետներին. «Սամվել Բաբայանն ասում է, որ պաշտոնի համար չի եկել: Կարող ենք հավատալ կամ ոչ, բայց փոխարենը ինչ-ինչ ենթադրություններ ենք անում»:
Իսկ թե ինչու են հիմա ռազմական գործիչներն իրար քննադատում եւ հիշեցնում մեկը մյուսի սխալները, Թեւան Պողոսյանը նշեց. «Եթե գիտես, որ վաղը կարող է պատերազմ լինել, այդ մարդիկ մի խրամատում հիշելու են, թե ինչ են իրար ասե՞լ, թե՞ թշնամու դեմ են կռվելու: Վաղը կարող եք հայտնվել նույն խրամատում…Ցավոք, Արցախյան պատերազմի դեպքում չունենք ճիշտ նկարագրված պատմություն, որն ընդունելի է բոլորի համար: Չձեւակերպենք այնպիսի իրավիճակ, երբ այդ երեւույթը լինի մեզ ուղղորդող գործոն: Հայրենական պատերազմի ժամանակ շատ անգամ իրար մեջքից են խփել…»:
Լուիզա ՍՈՒՔԻԱՍՅԱՆ
