«Բլից ինֆո» մամուլի ակումբում ՀՀ Ազգային վիճակագրական ծառայության նախագահի խորհրդական Գուրգեն Մարտիրոսյանը որոշ տվյալներ ներկայացրեց մայիս ամսվա գնային տատանումների, տարվա առաջին հնգամսյակի ամփոփ վիճակագրության վերաբերյալ: Պարոն Մարտիրոսյանը նշեց, որ 2016-ին հունվարին սպառողական շուկայում արձանագրվել են էականորեն բարձր գներ` 2,2 տոկոս, հաջորդ ամիսներին անընդմեջ գնանկման միտում է գրանցվել: Մայիսին արձանագրել է գնանկում` 0,7 տոկոս: Վերջին չորս ամիսներին գնանկումները կազմել են 2,7 տոկոս: Ընդհանուր հինգ ամիսների կտրվածքով 2016-ի մայիսին 2015-ի դեկտեմբերի համեմատ արձանագրվել է գնանկում 0,6 տոկոս:
Գուրգեն Մարտիրոսյանի փոխանցմամբ` պարենային ապրանքների գները նվազել են մեկ տոկոսով. «Ամենաբարձր գնանկումն արձանագրվել է ձվի գծով, էական բարձր գնանկում է արձանագրվել բանջարեղենի և կարտոֆիլի ապրանքային խմբում` 7,1 տոկոս: Անփոփոխ են մնացել հրուշակեղենի, այլ մթերքների և ոչ ոգելից խմիչքների գները: Գնաճ է արձանագրվել հացամթերքի ( 0,2 տոկոս), մսամթերքի (0,4), ձկնամթերքի (0,8 տոկոս) գծով: Առավել բարձր գնաճ է գրանցվել մրգերի ապրանքային խմբում` 3,4 տոկոս: Գնանկում է արձանագրվել նաև կաթնամթերքի, շաքարավազի գծով: Ոգելից խմիչքների և ծխախոտի խմբում արձանագրվել է գնաճ»:
Գուրգեն Մարտիորսյանի փոխանցմամբ` մրգերի գծով գրանցվել է 3,4 տոկոս գնաճ. խնձորի գինն աճել է 10,5 տոկոսով, կիտրոնինը` 6,3 տոկոսով, աճել են նաև չամիչի, ընկույզի գները: Նվազել է նարնջի գինը: Բանջարեղեններից նվազել են կաղամբի, լոլիկի, վարունգի գները, գլուխ սոխի, գազարի գներն աճել են: Կարտոֆիլի գներն աճել են 27,5 տոկոսով:
Դառնալով վառելիքի շուկայում գնային տատանումներին` պարոն Մարտիրոսյանն ասաց. «Բենզինի գները 0,5 տոկոսով աճել են, դիզվառելիքի գները 2,9 տոկոսով նվազել»:
Կարդացեք նաև
ՀՀ քաղաքներից Երևանում գրանցվել է գնանկման ամենամեծ տոկոսը` 1 տոկոս: Ամենաաբարձր գնաճը արձանագրվել է Հրազդան, Եղեգնաձոր, Գավառ քաղաքներում:
Տաթև ՀԱՐՈՒԹՅՈՒՆՅԱՆ
