Գերմանիայի մայրաքաղաք Բեռլինում լրագրողներին հանդիպած այդ երկրի պաշտպանության նախարար Ուրսուլա վոն դեր Լեյենը խոսել է 2016թ. հունիսի 2-ին Գերմանիայի խորհրդարանում Հայոց ցեղասպանության ճանաչման մասին բանաձևի ընդունման և թուրք-գերմանական հարաբերությունների վերաբերյալ։ Այս մասին տեղեկացնում է թուրքական «Հաբերլեր» լրատվական գործակալությունը։
Նախարարին հիշեցրել են Թուրքիայի Հանրապետության նախագահ Ռեջեփ Թայիփ Էրդողանի խոսքերը, թե ընդունված բանաձևը լրջորեն ազդելու է թուրք-գերմանական հարաբերությունների վրա։ Ուրսուլա վոն դեր Լեյենին հարցրել են արդյոք որևէ կերպ տուժե՞լ են ռազմական համագործակցության ոլորտում թուրք-գերմանական հարաբերությունները։ Սրան ի պատասխան Նախարարն ասել է, որ Թուրքիան և Գերմանիան մի շարք ոլորտներում շատ հզոր և բազմակողմանի համագործակցություն են իրականացնում, և ինքը վստահ է, որ այն հետագայում այն ևս շարունակվելու է։
Ուրսուլա վոն դեր Լեյենը մեկնաբանել է նաև Բունդեսթագում ընդունված ցեղասպանության մասին նախագիծը. «Մեր նպատակը 100 տարի առաջ Օսմանյան կայսրության դաշնակիցը եղած Գերմանիայի դերը բացահայտելն էր։ Սեփական անցյալի հետ քննադատաբար և թափանցիկ կերպով առերեսվելը ձևավորում են Գերմանիայի հզոր ավանդույթները և այս որոշումն էլ կապված է դրա հետ»։
Կարդացեք նաև
