ԱԺ պատգամավոր Ռուզաննա Մուրադյանի հունիսի 7-ի ելույթը ԱԺ հայտարարությունների ժամին
Հունիսի 2-ին Մոսկվայում տեղի ունեցավ ՀՀ Ազգային ժողովի եւ ՌԴ Դաշնային ժողովի միջև համագործակցության միջխորհրդարանական հանձնաժողովի 27-րդ նիստը, որին մասնակցում էին ՀՀ ԱԺ տարբեր քաղաքական ուժեր ներկայացնող պատգամավորներ՝ ԱԺ փոխնախագահ, միջխորհրդարանական հանձնաժողովի համանախագահ Հերմինե Նաղդալյանի գլխավորությամբ:
Ապրիլյան պատերազմից հետո հունիսի 2-ին Մոսկվայում կայացած հայ-ռուսական միջխորհրդարանական համագործակցության նիստում չէր կարող, իհարկե, անդրադարձ չլինել Լեռնային Ղարաբաղի խնդրին:
Ավելին՝ Լեռնային Ղարաբաղում իրավիճակի փոփոխության հարցը ներառվեց օրակարգում և բազմակողմանի քննարկվեց թեˊ հայ խորհրդարանականների, թեˊ ռուս գործընկերների ակտիվ մասնակցությամբ: Քննարկման ժամանակ կարծիքների, մտքերի ակտիվ փոխանակում կատարվեց հարցերի տարբեր ուղղություններով, այդ թվում՝ անդրադարձ եղավ ռազմաքաղաքական զարգացումներին, դիվանագիտական գործընթացներին, ապրիլյան պատերազմի պատճառներին, արգելված զինատեսակներին և այլն:
Կարդացեք նաև
Չնայած որ նիստին հանդես եկող հայ պատվիրակության անդամներս ներկայացնում էինք տարբեր քաղաքական ուժեր, այնուամենայնիվ, երբ հարցը վերաբերվում է մեր երկրի անվտանգությանը, բոլորս հանդես ենք գալիս միասնականությամբ, որը և բխում է մեր երկրի շահերից: Համաժողովի ընթացքում ևս մեկ անգամ հիշատակվեց, որ հակամարտությունը ռազմական լուծում չունի, և կարևորվեց ձեռքբերված համաձայնությունը միջադեպերի հետաքննության մեխանիզմներ ներդնելու և դիտորդների թվի մեծացման ուղղությամբ:
Կարևոր էր, որ նիստի արդյունքում ստորագրվեց համապատասխան արձանագրություն, որը կարելի է ասել առաջին փաստաթուղթն է միջազգային կառույցի ներկայացուցիչների մասնակցությամբ, որտեղ հստակ նշվում է, որ Ադրբեջանն է եղել ռազմական գործընթացի նախաձեռնողը: Սա հասցեական հայտ ներկայացնելու լավագույն օրինակն է, որ ռազմական գործընթացները նախաձեռնվել է Ադրբեջանի կողմից:
Այոˊ, մեր համախմբվածությունն ու միասնականությունն է մեր երկրի առջև ծառացած ցանկացած խնդրի լուծման կարևորագույն նախապայմանը, որը միջազգային հարթակներում մեր ձեռքբերված, ինչպես նաև դեռ սպասվող հաջողությունների գրավականն է:
