Ապրիլյան պատերազմը պաշտպանության ոլորտում մի շարք խնդիրներ ի ցույց դրեց: Այդ մասին այսօր ԱԺ հայտարարությունների ժամին խոսեց ՀԱԿ խմբակցության պատգամավոր Գագիկ Ջհանգիրյանը:
Նա դժգոհեց, որ «եթերից այս օրերին քննարկվում են բանակի սպառազինության կարիքները, թիկունքային ծառայությունների մատուցման քանակն ու որակը, մարտական հերթապահության բացթողումները, առաջնագծի համալրման անհրաժեշտությունը, ինչով ակամա վտանգվում է առաջնագծում կանգնած զինվորն ու սպան: Երեւույթը հատկապես հարիր չէ զինված ուժերում բարձրագույն պաշտոններ զբաղեցրած, բանակի շինարարության գործում ներդրում ունեցած անհատների համար: Կոչ եմ անում, խնդրում եմ, դադարեցնենք բանակի բացթողումների, թերությունների հրապարակային բարձրաձայնումը»:
Այս կոչը կարծես անուղղակի ուղղված էր Սամվել Բաբայանին, որն իր հարցազրույցում անդրադարձել էր հենց այդ խնդիրներին՝ առաջնագծի համալրմանը, թիկունքային ծառայությունների մատուցմանը:
Գագիկ Ջհանգիրյանն առաջարկեց նաեւ իշխանություններին, որ այդ ոլորտում գիտելիքներ ու փորձ ունեցողների հետ քննարկումներ կազմակերպելու ձեւաչափ գտնեն:
Կարդացեք նաև
Նա խոսեց նաեւ իր գնահատմամբ՝ բացարձակապես անհանդուրժելի մի երեւույթի մասին եւս. «Հետապրիլյան օրերին սահմանային զորամասեր, դիրքեր այցելելը կարեւոր էր զինվորին ու բանակին ոգեւորելու, նրան համախմբված ժողովրդի աջակցությունը փոխանցելու համար: Բայց երբ համացանցով դիտում ես, թե ինչպես են սահմանային զորամասեր այցելած պաշտոնյային, արվեստի գործչին, մեծահարուստին կամ պատգամավորին դիմավորում հրապարակում կանգնած զինվորական ստորաբաժանումները՝ զայրույթը թաքցնել հնարավոր չէ: Զինվորական ո՞ր կանոնագրքով կամ պաշտպանության նախարարի ո՞ր հրամանով է նախատսված զինվորական պատվի ու ընդունելության արժանացնել ԶՈՒ-ի հետ կապ չունեցող որեւէ մեկին: Ո՞վ է իրավունք տվել վիրավորել մեր զինվորականի պատիվն ու արժանապատվությունը»: Այս տողերով էլ նա, կարծես թե, անդրադարձավ Արմենչիկի, Սամվել Ալեքսանյանի եւ այլոց արարքներին:
Հռիփսիմե ՋԵԲԵՋՅԱՆ
