Էկոնոմիկայի նախարարությունում հունիսի 7-ին Շուկայի վերահսկողության տեսչական ծառայության կազմակերպած տնտեսվարող սուբյեկտների իրազեկման միջոցառմանը բարձրացվեց նաեւ գնաճի խնդիրը: Միջոցառման ընթացքում ներկայացվեց օրենսդրական դաշտում տեղի ունեցած վերջին փոփոխությունները՝ պայմանավորված Հայաստանի՝ ԵԱՏՄ անդամակցությամբ:
Մասնավորապես՝ «Any Rose» ընկերության ներկայացուցիչը նկատեց, որ եթե 3 դրամանոց դրոշմապիտակն է բերում գների թանկացման, հետեւաբար՝ նույնը կլինի սերտիֆիկատների դեպքում:
Շուկայի վերահսկողության տեսչական ծառայության պետ Լեւոն Խալիկյանը պատասխանեց. «Իմ ներկայացրածի մեջ թանկացման բացարձակ ոչ մի մեխանիզմ չկար: Եթե մենք այսօր կանչել ենք բենզին ներմուծողներին, բենզինի վաճառքով զբաղվողներին՝ տեղեկացնենք, որ եթե ինչ-որ տեղ կա՝ թերալցվում է, եթե ինչ-որ տեղ կա «Ռեգուլյարը» «Սուպերի» տակ են ծախում, այդ ամենը վերացնեն, ինձ թվում է՝ ընդհակառակը՝ բերելու է էժանացման: Ցանկացած բենզալցակայանում, որտեղ 20 լիտրի փոխարեն լցնում են 18, կկասեցվի նրա գործունեությունը: Ցանկացած բենզալցականում, որտեղ «Ռեգյուլարը» լցնում են «Սուպերի» փոխարեն, այդ բենզալցակայանն էլ կտուգանվի եւ կկասեցվի: Այստեղ որեւէ մեխանիզմ չկա, որը կբերի թանկացման: Այստեղ բոլոր ներկաները սպառողներ են. բոլորդ էլ բենզին եք լցնում, գազ էլ եք լցնում, խաղալիք էլ եք առնում: Բնական է, եթե մտնում եք բենզալցակայան՝ բենզին եք լցնում, 20 լիտրի գումար եք վճարում, 18 են լցնում, դուք էլ եք սպառող, դուք էլ եք ձեզ խաբված զգում»:
Ամի ՉԻՉԱԿՅԱՆ
Կարդացեք նաև
