«Խաղալիքը պարտադիր պետք է ունենա համապատասխան սերտիֆիկատ»,- հունիսի 7-ին լրագրողների հետ զրույցում ասաց Շուկայի վերահսկողության տեսչական ծառայության պետ Լեւոն Խալիկյանը:
Նա պարզաբանեց, որ սերտիֆիկատի առկայությունը փաստում է, որ տվյալ խաղալիքն անվտանգ է, համապատասխանում է ազգային չափանիշներին. «Սերտիֆիկատի բացակայության դեպքում՝ ոչ ոք չի կարող ասել, թե տվյալ խաղալիքը համապատասխանո՞ւմ է, թե՞ ոչ: Իրականացվել են բավականին շատ ստուգումներ, արձանագրվել են բավականին խախտումներ, եղել են նաեւ դեպքեր, երբ խաղալիքների մի ամբողջ խմբաքանակ ոչնչացվել է»:
Լեւոն Խալիկյանը նշեց, որ խաղալիքների վաճառք իրականացնող ցանկացած կազմակերպություն պարտավոր է հաճախորդի առաջին իսկ պահանջի դեպքում ներկայացնել սերտիֆիկատ: Խաղալիքները պետք է ռուսերեն եւ հայերեն մակնշումներ ունենան. «Տվյալ մակնշման վրա պետք է զետեղված լինի այն բոլոր ինֆորմացիան, որն անհրաժեշտ է գնողին իմանալ՝ ո՞ւմ կողմից է արտադրված տվյալ խաղալիքը, որքա՞ն է ժամկետը ու ի՞նչ է իրենից ներկայացնում»:
Լեւոն Խալիկյանը հայտնեց, որ Հայաստան խաղալիքները հիմնականում ներկրվում են Չինաստանից, նա շեշտեց, որ այդ հանգամանքը չի նշանակում, որ այդ խաղալիքները վտանգավոր են. «Ցանկացած խաղալիք պետք է անցնի լաբորոտոր փորձարկում, որից հետո ստանում է համապատասխան սերտիֆիկատ, որը փաստում է, որ այդ խաղալիքն անվտանգ է»:
Կարդացեք նաև
Ամի ՉԻՉԱԿՅԱՆ
