Ավան եւ Նոր Նորք վարչական շրջանների ընդհանուր իրավասության առաջին դատարանում հունիսի 6-ին դատավոր Դավիթ Հարությունյանի նախագահությամբ շարունակվում էր 2015 թվականի հունվարի 28-ին Վազգեն Սարգսյանի անվան ռազմական ակադեմիայում սպանված կուրսանտ Հայկազ Բարսեղյանի գործի քննությունը:
Դատական նիստի ընթացքում որպես տուժողի իրավահաջորդի ներկայացուցիչ ներգրավվեց Անի Թորոսյանը: Հիշեցնենք, որ տուժողի իրավահաջորդ Արկադի Բարսեղյանի շահերը պաշտպանում է նաեւ փաստաբան Գարիկ Գալիկյանը: Վերջինս, սակայն, դատական նիստի ընթացքում հայտարարեց, որ հրաժարվում է իր ծառայությունները մատուցել, մասնակցել դատական նիստերին եւ խնդրեց դատարանին՝ գործից իրեն հեռացնելու վերաբերյալ որոշում կայացնել. «Պարոն Բարսեղյանը, ըստ էության, չի ցանկանում, որ ես հրաժարվեմ, հարգելի՛ դատարան: Թույլ տվեք պատճառների մասին ավելի չմանրամասնեմ, բայց ըստ էության, ես հրաժարվում եմ իմ պարտականությունները կատարելուց, քանի որ գործով ամբաստանյալ չի, եւ ես կաշկանդված չեմ, ուստի ես այդ հայտարարությունն անում եմ»:
Արկադի Բարսեղյանը հայտարարեց, որ այդ թեմայի շուրջ զրուցել է Գարիկ Գալիկյանի հետ, սակայն համաձայնության չեն եկել, եւ ինքը ցանկանում է, որ նա շարունակի պաշտպանել իր շահերը: Պատասխանելով դատարանի հարցերին՝ Արկադի Բարսեղյանն ասաց՝ դեմ է, որ Գալիկյանն իր պարտականությունները դադարեցնի:
Դատավոր Դավիթ Հարությունյանը առաջարկեց Գարիկ Գալիկյանին ժամանակ տրամադրել: Վերջինս պատասխանեց, որ չէր ցանկանա, որպեսզի դատական նիստն այդ հիմքով հետաձգվեր, քանի որ այլ ներկայացուցիչ կա. «Եթե դատարանը նպատակահարմար է գտնում, որ միգուցե 1-2 դատական նիստ ինձ ժամանակ տրվի, ես որեւէ խնդիր չեմ տեսնում՝ հարգելով դատարանի եւ տուժողի իրավահաջորդի կարծիքը: Բայց ես կխնդրեմ, որպեսզի ինձ հնարավորություն ընձեռնվի այս դատական նիստին ներկա չգտնվել»:
Կարդացեք նաև
Դավիթ Հարությունյանը նրան այդ հնարավորությունը տվեց: Գարիկ Գալիկյանը հայտարարեց, որ տուժողի իրավահաջորդի հետ բացարձակապես ոչ մի խնդիր չունի, նույնն էլ Անի Թորոսյանի հետ: Նա դատարանին հայտնեց, որ գրավոր իր դիրքորոշումը կհայտնի եւ հեռացավ դատական նիստերի դահլիճից:
Ամի ՉԻՉԱԿՅԱՆ
