«Մեր թիրախը պետք է լինի Թուրքիան»
«Ընդհանրապես, Ցեղասպանության խնդիրը փաստ է, որ դարձել է միջազգային քաղաքական առեւտրի առարկա»,- հունիսի 4-ին «Դիալոգ» մամուլի ակումբում լրագրողների հետ հանդիպման ընթացքում ասաց թուրքագետ Ռուբեն Մելքոնյանը:
Նա նշեց, որ դեմ է ինքնանպատակ ճանաչումներին. «Մեր թիրախը պետք է լինի Թուրքիան, թուրքական հասարակությունը եւ պետությունը: Արդյոք այս ճանաչումները նպաստո՞ւմ են թուրքական կարծր ուրացման քաղաքականության փոփոխությանը: Ես կարծում եմ, որ ոչ: Այն տրամադրությունները, որոնք հիմա իշխում են Թուրքիայում գնում են դեպի ավելի կարծրացման:
Այսօր Թուրքիայում հակահայկական տրամադրությունները աճում են, այսօր թուրքական հասարակությունը կոնսոլիդացվում է, կենտրոնանում է թուրքական իշխանության եւ Էրդողանի ագրեսիվ քաղաքականության շուրջ: Դրա խոսուն վկայություններից է, որ Թուրքիայի խորհրդարանում ներկայացված 4 կուսակցություններից 3-ը երեկ միասնական հայտարարություն արեցին ընդդեմ Գերմանիայի Բունդեսթագի Հայոց ցեղասպանության ճանաչման վերաբերյալ ընդունված բանաձեւի»:
Կարդացեք նաև
Ռուբեն Մելքոնյանը կարեւորում է Թուրքիայում իրավական որոշակի խնդիրների արծարծումը եւ բողոքարկումը, քան տարատեսակ պետությունների կողմից Հայոց ցեղասպանության հարցի արծարծումը. «Թիրախը պետք է լինի թուրքական ընկալման մեջ որոշակի փոփոխություն առաջացնելը, քանի որ ինչպես տեսնում ենք, թուրքական ընկալումը շարունակում է մնալ ցեղասպան, եւ անգամ Թուրքիայի խորհրդարանում ազգությամբ հայ պատգամավորը թիրախավորվում է իր էթնիկ պատկանելիության համար: Եթե Բունդեսթագը մի կողմից ընդունում է Ցեղասպանությունը դատապարտող որոշում, բայց այդ նույն ցեղասպան մտածելակերպը շարունակվում է իր գործընկեր Թուրքիայում, ապա կարծում եմ, որ սա ընդհանուր քաղաքական խաղ է, որտեղ Հայոց ցեղասպանության խնդիրը ուղղակի ֆոն է, ոչ թե նպատակ»:
Ամի ՉԻՉԱԿՅԱՆ
