«Մեզ մոտ արդեն ցավագին մի հիվանդություն է՝ երբ դրական կամ բացասական մի բան է լինում՝ սկսում են գտնել, թե ինչու եղավ: Հետապնդման վատ դրսեւորումն է: Հիմա Ցեղասպանությունը դատապարտող բանաձեւը Գերմանիայում ընդունվեց, ընդամենը 1 դեմ, 1 ձեռնպահ եղավ: Դրական կլիներ դա, եթե ցեղասպանությունը չլիներ»,- մեզ հետ զրույցում ասաց ԱԺ պետաիրավական հարցերի հանձնաժողովի նախագահ Հովհաննես Սահակյանը:
Նրա խոսքերով՝ «Հիմա էս մարդիկ ճանաչել են, պետությունը ճանաչել է: Սա որոշակի դադարից հետո գործընթաց է, որ նորից սկսում է: Եվ ճանաչել է ԵՄ-ի կարելի է ասել շարժիչը: Կարծում եմ, սա քայլ էր, որին պետք է հետեւեն ժողովրդավարական արժեքները կրող եւ տարածող ԵՄ-ի մյուս անդամ պետությունները: Հիմա քննարկել, թե սա արեցին Թուրքիայի դեմ, նրա օգտին, սրա համար՝ ավելորդ է: Դա արդեն դառնում է հոգեբանական սթրեսի դրսեւորում: Մենք պետք է ողջունենք: Ես ասել եմ, որ սա քննություն է Գերմանիայի համար՝ որպես ժողովրդավարական պետություն»
Հովհաննես Սահակյանն ասաց, որ պետք է լուռ իրենց քայլերով հասնեն նրան, որ ամբողջ աշխարհը կճանաչի, որից հետո մեխանիկորեն կստիպեն, որ Թուրքիան էլ ճանաչի:
Հռիփսիմե ՋԵԲԵՋՅԱՆ
