«Գերմանիայի Բունդեսթագը չի ենթարկվի երկրի կանցլեր Անգելա Մերկելին, որը Թուրքիայի նախագահին հավաստիացրել է, որ ամեն ինչ կանի՝ Բունդեսթագում հայամետ բանաձևի քվեարկությունը խոչընդոտելու համար»,-կարծում է թուրքագետ Հակոբ Չաքրյանը: Այսօր` հունիսի 2-ին, «Հայելի» մամուլի ակումբում նա ասաց, որ կասկածելի է` արդյոք կիրականանա՞ Մերկելի եւ Էրդողանի պայմանավորվածությունը եւ այդպիսով Հայոց ցեղասպանությունը դատապարտող նախագիծը չի ընդունվի:
Հակոբ Չաքրյանը տեղեկացրեց, որ երեկ թուրքական հեռուստաընկերություններից մեկը հաղորդել է, որ Թուրքիայի արտգործնախարար Մեւլութ Չավուշօղլուն դիմել է ՌԴ արտգործնախարարությանը` ռուս-թուրքական համատեղ խումբ ստեղծելու առաջարկով: Չավուշօղլուի առաջարկի նպատակն է` բարելավել ռուս-թուրքական հարաբերությունները. «ՌԴ արտգործնախարարությունն իսկույն մերժել է առաջարկը` ասելով, որ հարաբերությունների բարելավմանն ուղղված ՌԴ առաջարկները Թուրքիային քաջ հայտնի են: Սիրիայում ռուսական կործանիչի խոցումից հետո Պուտինը հայտարարեց, որ Թուրքիան պետք է պաշտոնապես ներողություն խնդրի, վճարի փոխհատուցում եւ պատժի պատասխանատուներին: Վերջին հարցը բարդ է: Կրակել է ահաբեկիչ, բայց նրան հրամայել են, որ խփի օդապարիկով վայրէջք կատարող ռուս օդաչուին: Ինքնաթիռի խոցումից հետո Դավութօղլուն գլուխ գովելու նպատակով Էրդողանից առաջ ընկավ` ասելով, թե ինքն է կարգադրել խոցել ռուսական ինքնաթիռը: Երբ ՌԴ-ն կոշտ արձագանքեց, թուրքական կողմը սկսեց մեղադրել իր ԶՈՒ գլխավոր շտաբին, հետո` ռազմաօդային ուժերի գլխավոր հրամանատարին, հետո` օդաչուին…»
Հակոբ Չաքրյանի խոսքով` Թուրքիայի հանդեպ ՌԴ-ի կոշտ վերաբերմունքը պայմանավորված է Էրդողանի սանձարձակ պահվածքով. «Նա այդ օրերին սանձարձակ հայտարարություններ էր անում, գոռոզանում, որ ինքնաթիռ են խփել»:
Բանախոսը նաեւ փաստեց, որ Թուրքիայի նախագահի մասին բացասաբար են արտահայտվում հատկապես Վաշինգթոնում տեղի ունեցած միջուկային անվտանգության գագաթաժողովից հետո, երբ Էրդողանն ինքնագլուխ հայտարարություններ էր արել. «Չի հասկանում` ինչ է խոսում…Վաշինգթոնում թուրքական կողմից մի ամսվա խնդրանքներից հետո Օբաման վերջապես ընդունեց նրան: Հանդիպումից Էրդողանը դուրս եկավ եւ ասաց, թե Օբաման Սիրիայի քրդերի հարցում պաշտպանում է Թուրքիայի տեսակետը: Հաջորդ օրն Օբաման ասում է, որ Էրդողանի հետ Սիրիայի քրդերի մասին չի էլ խոսել: Այսինքն, Օբամայի անունից սուտ է խոսում: Հետեւանքը` Էրդողանից զզվում են: Հեղինակավոր պարբերականներն ինչ ասես գրեցին նրա մասին, ծաղրեցին, անգամ անպատվեցին: Էրդողանը ծիծաղելի վիճակում է»:
Կարդացեք նաև
Ըստ Չաքրյանի` տեղեկություններ կան, որ Էրդողանը «էպիլեպսիայով» եւ «շիզոֆրենիայով» է տառապում. «Վատ էր զգացել-ընկել էր, մի բժշկուհի պատահական օգնության էր հասել, մեկ ամիս անց այդ բժշկուհու դիակը գտան անտառում»:
Լուիզա ՍՈՒՔԻԱՍՅԱՆ
