Հունիսի 1-ին երեխաների պաշտպանության միջազգային օրը Նոյեմբերյանի քաղաքային զբոսայգում, ուղիղ գծով Ադրբեջանի սահմանից մոտ 3 կմ հեռավորությամբ, կայացավ տոնական միջոցառում: Բազմամարդ էր, այնտեղ էին ոչ միայն Նոյեմբերյան քաղաքի փոքրիկներն՝ իրենց մայրերի հետ, այլ նաեւ՝ տարածաշրջանի գյուղերից երեխաներ: Միջոցառումը կազմակերպել էր Նոյեմբերյանի մարզամշակութային կենտրոնը (տնօրեն՝ Մելսիդա Վերանյան):
Այդ կենտրոնի «Սոսե» (գեղարվեստական ղեկավար՝ Կարինե Ջիլավյան) եւ սահմանամերձ Բերդավանի «Դափնե» պարային համույթները ներկայացրին հետաքրքիր ելույթներ:
Նոյեմբերյանի քաղաքապետարանի եւ «Վորլդ Վիժն» կազմակերպության կողմից երեխաներին նվիրվեց պաղպաղակներ, այլ նվերներ: «ՍՕՍ-մանկական գյուղեր» կազմակերպության Իջեւանի մասնաճյուղի կողմից երեխաներին հանձնվեցին պայուսակներ, ուր ներկեր էին, փուչիկներ, պղպջակներ արձակելու սարք, գլխարկներ:
Կարդացեք նաև
«Հույսի կամուրջ» ՀԿ Նոյեմբերյանի մասնաճյուղի երեխաները նկարազարդումներ արեցին զբոսայգու պատերին, գետնին, թղթերի, նկարակալների վրա: Հանդեսին ներկա էին նաեւ սահմանամերձ Դովեղի մանկապարտեզի սաները:
Ադրբեջանին սահմանակից Կոթիի մանկապարտեզի սան Սուրեն Վերանյանն արտասանեց գյուղի մանկապարտեզի տնօրեն Սեդա Ղազինյանի հեղինակած բանաստեղծությունը: Այնտեղ այսպիսի մտքեր կան ՝ Նժդեհի թոռներն ենք, չենք վախենում, երբ կրակոցներ են լինում, ապաստարան ենք մտնում եւ այլն:
Ոսկան ՍԱՐԳՍՅԱՆ
