Հյուսիս-Հարավ ճանապարհի կառուցման նպատակով մայրաքաղաքում եւ հարակից բնակավայրերում հողի օտարման եւ տարաբնակեցման ծրագիր է հաստատված: Ծրագիրը բաղկացած է երկու տրանշներից: Ըստ կառավարության որոշման տրանշ 1-ը ներառում է Շիրակի փողոցի եւ Արտաշատի խճուղու բարելավումը, Արշակունյաց պողոտայի եւ Հյուսիս-հարավ ճանապարհային միջանցքի փոխհատման լայնացումը:
Տրանշ 2-ը ներառում է Արգավանդ-Շիրակ, Դավթաշեն-Աշտարակ եւ Բաբաջանյան-Աշտարակ ճանապարհային հանգույցների բարելավումը: Ծրագրի հիմնական նպատակն է լրացնել քաղաքային արեւմտյան օղակի բացակայող ճանապարհային հանգույցները, որով կապ կհաստատվի Արտաշատի խճուղու եւ Մ 2 միջպետական ճանապարհի միջեւ:
Երեւանի քաղաքապետ Տարոն Մարգարյանը վաղը, կառավարության նիստում կհայտնի, որ ճանապարհաշինության աշխատանքները շարունակելու նպատակով կառավարության հաստատմանն է ներկայացվում Հյուսիս-Հարավ ճանապարհային միջանցքի եւ Արտաշատի խճուղու փոխհատման ճանապարհահատվածի հողի օտարման եւ տարաբնակեցման ծրագիրը:
Լուսինե ԲՈՒԴԱՂՅԱՆ
