Ինչպես ավելի վաղ հայտնել էինք, Սիրահարների այգում այսօր` հունիսի 1-ին, «Սեյվ դը չիլդրեն» հայաստանյան կազմակերպության նախաձեռնությամբ տեղի ունեցավ Երեխաների պաշտպանության միջազգային օրվան նվիրված «Երեխաների ձայնը» միջոցառումը, որի ընթացքում փոքրիկները լուսանկարվեցին, ծանոթացան կրթական ծրագրերի, մասնակցեցին ցուցահանդեսի:
Սիրահարների այգու բեմահարթակում ելույթ ունեցողների թվում էր «Փարոս» կամերային երգչախումբը, որի կազմակերպչական հարցերը հոգում է «Ունիսոն» հասարակական կազմակերպությունը:
Հատկանշական է, որ երգչախմբի` անվասայլակի օգնությամբ տեղաշարժվող անդամներին դժվարությամբ բարձրացրեցին բեմահարթակ, քանի որ կամրջակը փոքր-ինչ բարձր է կառուցված:
Կարդացեք նաև
Aravot.am-ն «Ունիսոն» հ/կ գործադիր տնօրեն Արմեն Ալավերդյանից կարծիք հարցրեց, թե Սիրահարների այգին որքանով է հարմարեցված հաշմանդամություն ունեցողների կարիքներին:
«Միջին մակարդակով է հարմարեցված, այստեղ վաղուց կառուցվել է հարմարեցված սանհանգույց, որը որոշ ժամանակով չէր գործում: Ամեն դեպքում, հաճույքով ենք գալիս այստեղ եւ ելույթ ունենում»,-ասաց Ալավերդյանը: Նա նշեց, որ հաշմանդամություն ունեցողների համար այգու ոչ բոլոր մուտքերն են հարմարեցված` բացի Դեմիրճյան-Բաղրամյան փողոցների խաչմերուկի մոտ գտնվող մուտքից, որտեղ կա թեքահարթակ:
Ինչ վերաբերում է բեմահարթակի կամրջակին, պարոն Ալավերդյանը փաստեց, որ առանց օգնականների` «Փարոս»-ի երգիչները չեն կարողանա հաղթահարել այն:
Լուիզա ՍՈՒՔԻԱՍՅԱՆ
