«Գտնում ենք, որ իրավաբանական անձը չի կարող ենթարկվել վարչական
պատասխանատվության, քանի որ Վարչական իրավախախտումների վերաբերյալ Հայաստանի Հանրապետության օրենսգրքում իրավաբանական անձը նախատեսված չէ որպես վարչական պատասխանատվության սուբյեկտ»,-այսպես է պատասխանում ՀՀ վարչապետ Հովիկ Աբրահամյանը Ազգային ժողովի պատգամավոր Տիգրան
Ուրիխանյանին:
Պատգամավորն առաջարկել էր «Վարչական իրավախախտումների վերաբերյալ ՀՀ օրենսգրքում փոփոխություն կատարելու մասին» Հայաստանի Հանրապետության օրենքի նախագծում ամրագրել, որպեսզի ճանապարհային երթեւեկության խախտում կատարած անձը ենթարկվի վարչական պատասխանատվության, անկախ այն բանից, որ այդ տրանսպորտային միջոցը հանդիսանում է իրավաբանական անձի սեփականությունը:
Գործող կարգի համաձայն՝ խախտում չկատարած անձը պետք է դրա մասին տեղեկացնի վարույթ իրականացնող մարմնին, միաժամանակ տեղեկություններ տրամադրելով որ ֆիզիկական անձն է կատարել տվյալ խախտումը:
Ինչպես տեղեկանում ենք կառավարության հունիսի 2-ի նիստի օրակարգից, Տիգրան Ուրիխանյանը որպես հիմնավորում նշել է, որ իրավաբանական անձի ղեկավարը կարող է գտնվել արտերկրում, առողջական պատճառներով լինել ժամանակավորապես անգործունակ, պատշաճ չծանուցվել եւ այլն. «Եվ վերջապես գոյություն ունեն այնպիսի իրավաբանական անձինք, որոնց կառավարումը իրականացվում է կոլեգիալ մարմնի կողմից, օրինակ` հասարակական կազմակերպություններ, կուսակցություններ եւ այլն: Այս պարագայում գործող կարգի համաձայն պատասխանատվության ենթարկելն ու տուգանք նշանակելը անհնար է: Ուստի ելնելով վերոգրյալից` առաջարկում եմ կատարել սույն փոփոխությունը «Վարչական իրավախախտումների վերաբերյալ Հայաստանի Հանրապետության օրենսգրքում»,-նշել է պատգամավորը:
Կարդացեք նաև
Վարչապետը նաեւ պատճառաբանել է, որ ներկայումս արդարադատության նախարարության կողմից մշակվում է Վարչական իրավախախտումների վերաբերյալ Հայաստանի Հանրապետության նոր օրենսգրքի նախագիծը, որը շրջանառվել եւ քննարկվել է շահագրգիռ մարմինների հետ եւ ներկայումս գտնվում է լրամշակման փուլում. «Ելնելով շարադրվածից, Հայաստանի Հանրապետության կառավարությունը դեմ է ներկայացված օրենքի նախագծի ընդունմանը»,-ասել է վարչապետը:
Լուսինե ԲՈՒԴԱՂՅԱՆ
