«Ամենալավ գործն էլ քննադատներ է ունենում, ամենավատ գործն էլ: Քաղաքացի է՝ ԼՂՀ-ի կամ ՀՀ-ի, ինքն էլ իր տեսակետն է ասում: Ամեն տեսակետ կշռել, վերլուծել, դրա մեջ ինչ-որ բան գտնել, կարծում եմ, ճիշտ չի: Մարդը եթե ցանկություն ունի մի բան անելու, ոչ թե կիսում է տեսակետներ, այլ գնում է այն ճանապարհով, որ կարողանա կատարել իր ցանկությունները»,- այսօր լրագրողների հետ զրույցում ԱԺ նախագահ Գալուստ Սահակյանն այսպես արձագանքեց ԼՂՀ պաշտպանության նախկին նախարար Սամվել Բաբայանի քննադատություններին:
Գալուստ Սահակյանի խոսքերով՝ «Մեր ժամանակներում յուրաքանչյուր մարդ իր խնդիրն է բարձրացնում, այդպիսի ժամանակներ ենք ապրում: Մարդիկ են, իրենց մտքերն ունեն, ասում են»:
Հարցին՝ այսինքն, Սամվել Բաբայանը սեփական խնդիրը լուծելու համա՞ր է վերադարձել՝ նա պատասխանեց. «Չեմ կարծում սեփական խնդիրը կամ ինչ-որ մեկի խնդիրը լուծելու համար է եկել: Դրա համար պիտի հստակ, կողմնորոշված պատասխանել հասարակությանը՝ ինչի համար եւ ինչ խնդիր ես ուզում լուծել»:
Ըստ Գալուստ Սահակյանի, ղարաբաղյան պատերազմի ընթացքում Սամվել Բաբայանը բավականին մեծ դերակատարում է ունեցել: Բայց նա ասաց, որ ներկայումս Սամվել Բաբայանի համար թափուր պաշտոն չունեն. «Էնպես չի, որ մարդը իր համար գնում ամբողջ աշխարհով ման է գալիս, հետո գալիս, ասում է՝ ինձ պաշտոն է անհրաժեշտ, որպեսզի կարողանամ առավելն անել»:
Կարդացեք նաև
Հարցին՝ բայց Սամվել Բաբայանը պաշտոն ուզո՞ւմ է՝ նա պատասխանեց. «Ես Սամվել Բաբայանին չեմ էլ տեսել, որ իմանամ՝ ուզում է, թե չի ուզում»:
Հռիփսիմե ՋԵԲԵՋՅԱՆ
