2016թ. մայիսի 29-ին Գերմանիայի թուրքական համայնքի մի շարք կազմակերպություններ այդ երկրի մայրաքաղաք Բեռլինում բողոքի ակցիա են կազմակերպել։ Այս մասին տեղեկացնում է թուրքական «Հաբերլեր» լրատվական գործակալությունը։
Գերմանիայի թուրքական համայնքի զայրույթը շարժել է այդ երկրի խորհրդարանականների նախաձեռնությունը, որով առաջարկվում է ճանաչել Հայոց ցեղասպանությունը։ Հիշեցնենք, որ այդ օրինագիծը Գերմանիայի Բունդեսթագում քվեարկության է դրվելու 2016թ. հունիսի 2-ին։
Թուրքական աղբյուրի համաձայն՝ բողոքի ակցիային մասնակցել է շուրջ 1500 գերմանաբնակ թուրք։ Ցուցարարներն իրենց հետ ունեցել են պաստառներ, որոնց վրա բազմաթիվ կոչեր են եղել՝ ուղղված Գերմանիայի խորհրդարանին և իշխանություններին։ Նրանց կարծիքով՝ ցեղասպանության լինելիության, կամ չլինելիության հարցը տարբեր երկրների խորհրդարանների քննարկման առարկա լինել չի կարող և նմանատիպ հարցերի շուրջ ամենաճիշտ որոշումը կարող են կայացնել միայն համապատասխան հարցերով զբաղվող պատմաբանները։
Կարդացեք նաև
Տեղեկացնենք, որ այս օրերին Թուրքիայի մի շարք քաղաքներում և հատկապես Թուրքիայի սահմաններից դուրս ապրող թուրքերը ակտիվորեն լծվել են Գերմանիայի խորհրդարանում հայտնված Հայոց ցեղասպանության ճանաչման նախագծի դեմ պայքարին, ամեն կերպ նպատակ ունենալով կանխել դրա ընդունումը։ Արդեն իսկ բողոքի ակցիաներ են տեղի ունեցել Ստամբուլում և Իզմիրում տեղակայված Գերմանիայի հյուպատոսարանի առջև։
Հակահայկական այս պայքարում խիստ ակտիվ է հայերիս քաջածանոթ Դողու Փերինչեքն ու իր գլխավորած «Վաթան» կուսակցությունը։
