Ադրբեջանի նախագահ Իլհամ Ալիևի՝ հասարակական-քաղաքական հարցերով օգնական Ալի Հասանովը մի քանի հայտարարություններ է արել Լեռնային Ղարաբաղի հակամարտության վերաբերյալ։ Այս մասին տեղեկացնում է Trend.az լրատվականը։
Ադրբեջանի նախագահի խորհրդականը սկզբում անդրադարձել է Ադրբեջանի արտաքին քաղաքականությանը. «Մենք, որպես Ադրբեջան, միջազգային հարաբերությունների հիմնական կողմ ենք, համաշխարհային քաղաքականության մաս»։
Անդրադառնալով արդեն Արցախի հակամարտությանը՝ Հասանովն ասել է. «Միջազգային իրավունքի մի շարք նորմեր կան, որոնց համաձայն՝ նմանատիպ հակամարտությունները պետք է խաղաղ կարգավորվեն, բայց, միևնույն ժամանակ, առկա է ՄԱԿ-ի ընդունած 4 բանաձև, որոնց համաձայն՝ ադրբեջանական բռնազավթված տարածքները պետք է ազատվեն»։
Ալի Հասանովն անդրադարձել է նաև 2016թ. ապրիլի սկզբին տեղի ունեցած ռազմական բախումներին՝ նշելով, որ Ադրբեջանը, անսալով միջազգային հանրության հորդորները, դադարեցրել է ռազմական գործողությունները, իսկ հրադադարի ռեժիմի վերահաստատման գործում նշանակալի է Ռուսաստանի Դաշնության նախագահ Վլադիմիր Պուտինի ավանդը։
Կարդացեք նաև
Ալիևի խորհրդականը խոսել է նաև 2016թ. մայիսի 16-ին Վիեննայում ԵԱՀԿ Մինսկի խմբի աջակցությամբ կայացած Հայաստանի և Ադրբեջանի նախագահների հանդիպման մասին. «Վիեննայում տեղի ունեցած գործընթացները ցույց տվեցին, որ Ադրբեջանն ավելի պահանջկոտ էր խոսում համանախագահող երկրների հետ։ Ադրբեջանն ունի դրա իրավունքը։ Հայկական կողմը զբաղվում էր այլ կողմերի դիրքորոշման ուսումնասիրությամբ»։
Ալի Հասանովը նշել է նաև, որ համանախագահող երկրները վճռական՝ են ստեղծված ստատուս-քվոն չպաշտպանելու հարցում և այսուհետ հակամարտությունն ավելի ինտենսիվ բանակցությունների առարկա է դառնալու։
Այնուամենայնիվ, Ալիևի խորհրդականն որոշակի դժգոհություն է արտահայտել ԵԱՀԿ Մինսկի խմբի համանախագահ երկրների որդեգրած դիրքորոշումից. «Երկրները, որոնք հանդիպումներ են կազմակերպում, պետք է կամք ցուցադրեն։ Ի՞նչ ենք հասկանում մենք՝ կամք ասելով. Նրանք պետք է ճնշում գործադրեն Հայաստանի վրա, ստիպեն նրանց լրջորեն մոտենալ խաղաղ բանակցային գործընթացին»։
