Այս տարին հոբելյանական է ծնունդով Վայոց ձորից, ԽՍՀՄ եւ ՀՀ ժուռնալիստների միության անդամ, Համահայկական երգիծաբանների միության անդամ Արթուր Բունիաթյանի համար: Լրանում է նրա ծննդյան 70-ամյակը: Բունիաթյանն աշխատել է «Ջերմուկ» թերթում, Հեռուստապետկոմի Լրաբեր՝ այսօրյա 1-ին ալիք ինֆորմացիոն խմբագրությունում որպես խմբագիր, Ազգային ռադիոյում եւ այլուր: 2009-ին հիմնել է «Ասպետ» անկախ թերթը, որի գլխավոր խմբագիրն ու տնօրենն է առայսօր: Նա ընթերցողների շրջանում հայտնի է նաեւ Արթուր Արամի, Արթուր Աթյան գրական կեղծանուններով: Նա ընթերցողին մինչ այժմ ներկայացել է «Հողի ուժը» արձակ եւ «Մոլորակի ժամ» չափածո ստեղծագործությունների գրքերով: Շուտով լույս կտեսնեն «Դարի տագնապներ», «Ծիծաղափունջ Վայոց ձորից» գրքերը:
Արթուր Բունիաթյանը երիտասարդ ստեղծագործողներին հորդորում է թանաքը չչորացած գործերը թերթերում տպագրել մինչեւ 60-70 տարեկան դառնալը, ապա հղկել դրանք, վերանայել, էտել ծառի պես անպտուղ ճյուղ-տողերը եւ անցնել գրքերի տպագրությանը: Նրանք, ովքեր չեն եղել Վայոց ձորում, հեղինակի բանաստեղծություններն ընթերցելով կարող են «հպվել» Նորավանքի, Գնդեվանքի, Արատեսի մյուռոնաբույր զորավոր խաչքարերին եւ մտովի ըմբոշխնել արեւով համեմված ծիրանի, խաղողի, գինու անմահացնող համն ու հոտը, անսպառ ջերմությունը… Արթուր Բունիաթյանի բանաստեղծությունների շարքին է պատկանում «Գնդեվանքը սիրո տաճար»-ը.
Գնդեվանքում ես Սյունյաց տիրուհու
Շիրմաքարին եմ շուրթերս հպում,
Կարդացեք նաև
Լսում սրտի զարկերն անդադար,
Հոգուս մեջ սիրո բողբոջն է պայթում
Բաց ստինքներին չքնաղ Սոփիայի
Խոնարհվում են գմբեթ ու կամար,
Հյուսքերից հողին լույս է կաթկթում…
ԱՐԵՎ ԲԱՐՍԵՂՅԱՆ
«Առավոտ»
28,05,2016
