Այսօր, երբ աշակերտը մատի մեկ հպումով կարող է համացանցից քաղել իրեն հետաքրքրող ամեն տեղեկատվություն, դպրոցում դասավանդելն ավելի պատասխանատու է դարձել: Մանկավարժը պետք է ուշադիր, տեղեկացված, հետաքրքիր լինի, որպեսզի կարողանա լսարան պահել:
Օտար լեզվի ուսուցիչները, իսկ ես գերմաներեն եմ դասավանդում, պետք է կարողանան ի սկզբանե սեր արթնացնել լեզվի նկատմամբ, օրինակ՝ կրտսեր դպրոցում հստակ դնեն լեզվական նախագիտելիքների ու տարրական գիտելիքների հիմքը, որպեսի հետագա «պատերն» ավելի ամուր լինեն: Տարրական դասարաններում օտար լեզվի ուսուցումը պետք է անել խաղային եղանակով՝ օգտագործելով առարկաներ ներկայացնող պատկերներ, լեգո, ստվարաթղթից կտրված մրգեր, տիկնիկներ եւ այլն:
Գերմաներեն ՝լեզվի կրտսեր եւ միջին դպրոցում դասավանդման ընթացքում պետք է կարողանալ լուծել հետեւյալ հիմնական խնդիրը՝ աշակերտների խոսակցական լեզվի, միմյանց հետ գերմաներենով շփվելու եւ այդ լեզվով բանավոր խոսքի ընկալման հմտությունների զարգացումը: Դասավանդումը պետք է տոնի վերածել՝ դիմելով, օրինակ, դերախաղերի: Այդպես դասերը հետաքրքիր են անցնում, ամրապնդվում է բառապաշարը, նաեւ նոր գիտելիք է փոխանցվում:
Ինչ վերաբերում է ավագ դպրոցում գերմաներենի ուսուցմանը, դրա անհրաժեշտությունն էլ պայմանավորված է հիմնական կրթական ծրագրերի բովանդակային շարունակության ու սովորողների մտահորիզոնի զարգացման իրականացման հրամայականով:
Ավագ դպրոցում շեշտադրվում է օտար լեզվի ուսուցումը, որովհետեւ ավագ դպրոցն այն աստիճանն է, որը նախորդում է բուհին: Ավագ դպրոցում հիմնական ուշադրությունը պետք է բեւեռել բառապաշարի, հնչյունաբանության եւ քերականության վրա: Ուսուցումն իրականացնելիս կարելի է ֆիլմեր ցուցադրել, ստեղծագործական աշխատանքներ կատարել, դիմել խաղերի, մրցույթների, համակարգչային ծրագրերի օգտագործման եւ բնականաբար՝ թեստերի ու հարցաշարերի կիրառման:
Ուրախ ենք, որ արտասահմանյան դպրոցների հարցերով կենտրոնակայան է գործում, եւ ԳԴՀ արտաքին գերատեսչության, ԳԴՀ երկրամասերի հետ սերտ համագործակցությամբ աջակցություն է ցուցաբերվում ամբողջ աշխարհով մեկ գործող ավելի քան 140 դպրոցների, ինչպես նաեւ ԳԴՀ կողմից խրախուսվող շուրջ 1100 դպրոցական հաստատությունների եւ պետական դպրոցների գերմանական բաժինների։ Հայաստանի որոշ դպրոցներ նույնպես մասնակից են:
ՆԱԻՐԱ ԳՐԻԳՈՐՅԱՆ
Սեւանի թիվ 6 միջնակարգ դպրոցի ուսուցչուհի
«Առավոտ»
28,05,2016
