Այս համեղ եւ շատ արագ պատրաստվող քաղցրավենիքը նաեւ հրաշալի տարբերակ է՝ ավելացած սպիտակ հացը օգտագործելու համար: Պուդինգի համար հարմար է ինչպես հին բատոնը, «Հրազդան» հացը, այնպես էլ՝ չորացած բուլկին եւ կեքսը:
Անհրաժեշտ մթերքները
Սպիտակ հաց կամ բուլկի (բրիոշ, կեքս, բատոն, «քարե» հաց եւ այլն)- մոտ 0,5 կգ
Ձու-3-4 հատ
Կարդացեք նաև
Կաթ- 1,5 բաժակ
Շաքարավազ-3/4-1 բաժակ
Շաքարի փոշի-2 ճաշի գդալ
Կարագ- 100 գրամ
Վանիլի մզվածք- 1 ճաշի գդալ կամ 1 տուփ վանիլի փոշի
Չամիչ կամ չիր- ըստ ցանկության
Խտացրած կաթ, մուրաբա կամ պաղպաղակ-մատուցման համար
Պատրաստման եղանակը
Հացը կամ բուլկին կտրատեք ձեր ցանկացած ձեւով՝ հավասար շերտերի կամ փոքր կտորների: Առանձին հարեք ձուն, շաքարավազը եւ կաթը, ավելացնելով վանիլի մզվածքը կամ փոշին:
Ջեռոցի տարան, ցանկալի է հրակայուն ապակուց, առատորեն կարագապատել: Հացի շերտերը գեղեցիկ դասավորել մեջը, կամ կտորները խառը լցնել մեջը: Արանքներում, ըստ ցանկության, կարող եք չիր-չամիչ դնել, նարնջի կեղեւ քերել, շոկոլադի կտորներ շարել կամ մանրած ընկույզ:
Հացիկների վրա կամ արանքներում մանր կտորներով կարագ դրեք: Վերջում վրան լցրեք կաթնաձվային խառնուրդը: Դրեք 180 աստիճան տաքացրած ջեռոցը մոտ 20-30 րոպեով: Հետեւեք խմորին, երբ տեսնեք, որ կաթնաձվային խառնուրդը բարձրացել է, փայտիկով ստուգեք պատրաստվածության աստիճանը, եթե չոր է դուրս գալիս, նշանակում է, եփվել է: Հանեք պուդինգը ջեռոցից, երբ կսառչի, վրան շաքարի փոշի ցանեք:
Կարող եք մատուցել պաղպաղակի գնդիկով, խտացրած կաթով, հարած սերուցքով կամ որեւէ մուրաբայով:
Շատ համեղ է ինչպես սուրճի, այնպես էլ թեյի հետ:
Բարի ախորժակ:
Պատրաստեց ՄԵԼԱՆՅԱ ԲԱՐՍԵՂՅԱՆԸ
«Առավոտ»
28.05.2016
