Մայիսի 28-ին Տավուշի մարզի սահմանամերձ Նոյեմբերյան քաղաքում կայացավ հանդիսավոր միջոցառում: Օրվա խորհրդի մասին ելույթ ունեցան Նոյեմբերյանի տարածաշրջանում տեղակայված զորամասի հրամանատարի՝ անձնակազմի հետ տարվող աշխատանքների գծով տեղակալ, փոխգնդապետ Աշոտ Չոբանյանը, Նոյեմբերյանի քաղաքապետ Վանուշ Ամիրաղյանը, Հայաստանի գրողների միության Տավուշի մարզային բաժանմունքի նախագահ Սամվել Բեգլարյանը, Տեր Հրայր քահանա Բեջանյանը, Նոյեմբերյանի տարածաշրջանի վետերանների խորհրդի նախագահ Սերյոժա Գիշյանը: Փոխգնդապետ Ա. Չոբանյանը խոսելով Հայաստանի առաջին հանրապետության նշանակության մասին, նշեց, որ այն գոյություն է ունեցել 2 տարի, մինչդեռ 1918 թվականի մայիսի 28-ից մինչեւ 1920թ. նոյեմբերի 29-ը երկուսուկես տարի է:
Ա. Չոբանյանը Սամվել Բեգլարյանին ներկայացրեց որպես Նոյեմբերյանի գրողների միության նախագահ, Նոյեմբերյանի երկրապահների միության նախագահ, սակայն Նոյեմբերյանը գրողների միություն չունի, իսկ երկրապահ կամավորականների միության Նոյեմբերյանի տարածաշրջանային խորհրդի նախագահը Ռաֆիկ Ասլանյանն է (Մուրոն) , ով նույնպես գտնվում էր հրապարակի հարթակում:
Այնուհետեւ Նոյեմբերյանի զորամասի հետախույզները ցուցադրեցին մարտական հետաքրքիր հնարքներ, զինվորները շարային երթով անցան
հրապարակով: Նոյեմբերյանի քաղաքային զբոսայգում ներկայացված էին ազգային բանակի զինատեսակներ,այդ թվում՝ դիպուկահար զենք:
Կարդացեք նաև
Ոսկան ՍԱՐԳՍՅԱՆ
