Ուկրաինայի Լվով քաղաքում հայ մարզիկների եւ ադրբեջանցիների մասնակցությամբ զանգվածային ծեծկռտուք էր եղել:
Այսօր Aravot.am-ը սպորտի եւ երիտասարդության հարցերի նախարար Գաբրիել Ղազարյանից հետաքրքրվեց, թե ինչպե՞ս է ինքը վերաբերվում այդ միջադեպին եւ ի՞նչ գնահատական կտա: Նախարարը պատասխանեց. «Նախ այդ ֆեդերացիան, որը գործում է ՀՀ-ում, իրենք գրանցված չեն միջազգային ֆեդերացիայում, եւ երկրորդը՝ մենք բնականաբար տեղյակ ենք` ինչ է կատարվել Ուկրաինայում, եւ աշխատել ենք մեր քաղաքացիների կողքին լինել: Բայց կան այդ ֆեդերացիայի հետ ճանաչման խնդիրներ, պետք է ամեն ինչ հստակեցվի: Մենք արդարադատության նախարարության հետ նախագիծ ենք մշակում, որ ՀՀ-ում գործող բոլոր ֆեդերացիաները լիցենզավորվեն, որ նման դեպքերից խուսափեն»:
Մեր հարցին՝ երբ գրանցված չեն լինում, լիցենզավորում չեն ունենում, ստացվում է, որ ազդեցության որեւէ լծակ դուք չունե՞ք՝ նախարարը պատասխանեց. «Բնականաբար, մենք մեր լծակներն ունենք, բայց այդ ոլորտով ճիշտ եք ասում: Եթե գրանցված չի, պատկերացրեք, մենք էլ չգիտեինք այդ ֆեդերացիայի գոյության մասին: Դա ճի՞շտ է, ես գտնում եմ՝ ոչ: Մարզական բազմաթիվ ֆեդերացիաներ կան, որ մենք տեղյակ չենք իրենց մասին»:
Մեր հարցին՝ եթե այդ ֆեդերացիան լիցենզավորված լիներ, նույն միջադեպի արդյունքում մենք ինչի՞ կարող էինք հասնել՝ նախարարը պատասխանեց. «Յուրաքանչյուր թիմ, որը գնում է արտերկիր, ինքը ներկայացնում է ՀՀ-ն: Մենք չենք կարող թույլ տալ, որ ով ուզենա գնա եւ պետության անունից հանդես գա, դա ճիշտ չի: Դա արդեն կարգավորվելու է»:
Կարդացեք նաև
Հարցին՝ այսինքն, անօրինակա՞ն է այդ թիմն Ուկրաինայում ներկայացրել Հայաստանը՝ նախարարը պատասխանեց՝ այո, գնացել են՝ որպես հասարակական կազմակերպություն, որի մասին մենք տեղյակ չենք:
Նախարարը նաեւ ասաց, որ իրենք վարչապետի հանձնարարականով 30 մեքենաներից 14-ը կրճատել են:
Հռիփսիմե ՋԵԲԵՋՅԱՆ
