Ճանապարհային ոստիկանությունը հաճախ վարորդներին անհիմն է տուգանում, կամ էլ խախտմանը ոչ համարժեք տուգանք է նշանակում: Այսպիսի կարծիք հայտնեց այսօր «Անդրադարձ» ակումբում «Աքիլես» ավտովարորդների իրավունքների պաշտպանության կենտրոն հասարակական կազմակերպության ղեկավար Էդուարդ Հովհաննիսյանը: Նրա խոսքերով՝ ՃՈ կողմից վարորդներին անհիմն տուգանելը մի բանի մասին է խոսում՝ գումարներ պետք է հավաքագրեն:
Էդուարդ Հովհաննիսյանի ներկայացմամբ՝ հ/կ-ն բազմաթիվ վարորդներից դժգոհություններ է ստանում ճանապարհային ոստիկանության ոչ պատշաճ գործելաոճի վերաբերյալ. մասնավորապես խախտումների վերաբերյալ ոչ արդարացի որոշումների: Հովհաննիսյանն ասաց, որ տուգանքների մասին անհիմն եւ սխալ որոշումները վարորդները բողոքարկում են, սակայն ՃՈ վերադասը ոստիկանի կայացրած որոշումը թողնում է անփոփոխ:
«Ճանապարհային ոստիկանության կայացրած որոշումների 20-30%-ը խոտան է դուրս գալիս, որովհետեւ ոչ թե համադրում են, այլ ուղղակի պրինտ արած որոշումներ են: Բողոքարկումները երբ մերժում են, մենք դիմում ենք դատարան, ու բոլոր վարորդների հայցերը դատարանը վճռում է ի շահ վարորդների: Բայց էլի շարունակվում են նույն անհիմն տուգանքները: Ճանապարհային ոստիկանությանն էլ ենք ասել, բայց հետեւություն չեն անում»,-ասաց Հովհաննիսյանը:
Հ/կ-ի ղեկավարի ներկայացմամբ՝ 2014 թվականին արձանագրվել է 1 միլիոն 250 հազարի չափ տուգանքներ, որոնք կատարվել են տեսախցիկների, արագաչափերի միջոցով, իսկ 2015 թվականին 1,5 միլիոնն էլ է գերազանցել, ճանապարհատրանսպորտային պատահարների հետեւանքով զոհերի թիվն էլ մոտ 50-ով ավելացել է:
Կարդացեք նաև
Նելլի ԲԱԲԱՅԱՆ
