2016թ. հունիսի 2-ին Գերմանիայի խորհրդարանում քվեարկության է դրվելու Հայոց ցեղասպանության ճանաչման մասին նախագիծը։ Գերմանիայի խորհրդարանի կողմից Հայոց ցեղասպանությունը ընդունումը կանխելու համար 2016թ. մայիսի 28-ին Գերմանիայի թուրքական համայնքը բողոքի մեծամասշտաբ գործողություններ է իրականացնելու։ Այս մասին տեղեկացնում է թուրքական «Հաբերլեր» լրատվական գործակալությունը։
Նախատեսված բողոքի ակցիաների մասին խոսել է «Գերմանիայի թուրք-ադրբեջանական ընկերության» նախագահ Հաքքը Քեսքինը, նշելով, որ իրենք երբեք չեն ընդունի 1915թ. տեղի ունեցած դեպքերը, որպես ցեղասպանություն և պայքարելու են, որպեսզի Գերմանիայում կանխվի Հայոց ցեղասպանության ճանաչման գործընթացը։
Քեսքինի խոսքերով՝ Գերմանիայի թուրքական համայնքի բողոքի երթը կսկսվի Բեռլինի «Պոտսդամեր» հրապարակից, և բողոքի այդ ակցիային կմասնակցեն Գերմանիայում գործունեություն ծավալող թուրքական բոլոր կազմակերպությունները։ Քեսքինը նշել է նաև, որ արդեն բողոքի նամակներ են ուղարկվել Գերմանիայի նախագահին, կառավարության ղեկավարին և խորհրդարանի պատգամավորներին։
