Ղազախստանի արտաքին գործերի նախարար Եռլան Իդրիսովը հայտարարել է, որ Շանհայի համագործակցության կազմակերպության (ՇՀԿ) հաջորդ տարվա գագաթնաժողովը տեղի կունենա 2017թ. հունիսին՝ Ղազախստանում։ Այս մասին տեղեկացնում է kazinfo.kz կայքը։
Արտահայտվելով այս թեմայի վերաբերյալ՝ Իդրիսովը մասնավորապես ասել է. «Մենք շատ լուրջ ենք պատրաստելու Շանհայի համագործակցության կազմակերպության գագաթնաժողովը Ղազախստանում, որը տեղի կունենա 2017թ. հունիսին»։
Ղազախստանի արտաքին գերատեսչության ղեկավարը խոսել է նաև այդ կազմակերպության հետագա նպատակների մասին. «Մենք արդեն սկսել ենք խոսել Շանհայի համագործակցության կազմակերպության տարածքում ազատ առևտրային գոտու սահմանման նախադրյալներ ստեղծելու մասին»։
Տեղեկացնենք, որ վերը նշված կազմակերպության նախագահությունը Ղազախստանը կստանձնի այս տարվա հունիսին՝ Ուզբեկստանից՝ Տաշքենդում տեղի ունենալիք գագաթնաժողովից հետո։ Սպասվում է, որ 2017թ. Շանհայի համագործակցության կազմակերպության հիմնական քաղաքականությունն է լինելու բազմակողմանի զարգացումն ու դինամիզմի ավելացումը։
Կարդացեք նաև
Հիշեցնենք նաև, որ 2016թ. ապրիլի 16-ին Պեկինում ՀՀ ԱԳ նախարար Էդվարդ Նալբանդյանը և ՇՀԿ գլխավոր քարտուղար Ռաշիդ Ալիմովը հուշագիր ստորագրեցին, որով Հայաստանը երկխոսության գործընկերոջ կարգավիճակ ստացավ Շանհայի համագործակցության կազմակերպությունում։
