Ինչքա՞ն շահառուներ են ստացել ԽՍՀՄ ավանդները 2015-ին: Այսօր ԱԺ-ում 2015-ի բյուջեի կատարման հաշվետվությունը ներկայացնելիս աշխատանքի եւ սոցիալական հարցերի նախարար Արտեմ Ասատրյանն այս հարցին պատասխանեց. «Տարվա ընթացքում 7-8 հազար մարդ ստանում է ավանդների դիմաց փոխհատուցում: Պետբյուջեով 1.5 մլրդ է նախատեսվել ծախսային ծրագրի համար՝ 3 սոցիալական խմբերի համար: Առաջինը տարեցներն են՝ մինչեւ 1931-ի դեկտեմբերի 31-ը ծնվածները, երկրորդը՝ ՀՀ ՊԲ մարտական գործողություների մասնակիցները, ազատամարտիկներն են, 3-րդը՝ սահմանամերձ բնակավայրերի քաղաքացիները:
Պետբյուջեով նախատեսված միջոցները բաշխում ենք այդ 3 ուղղություններով: Ամենամեծ բաժինը տարեցներինն է՝ 50 տոկոսը, 40 տոկոսը՝ սահմանամերձ բնակավայրերի բնակիչներին, եւ 10 տոկոսը գնում է ազատամարտիկներին: Յուրաքանչյուր ամիս ձեւավորվում են տվյալ ամսվա հայտերը եւ գնում են վճարման: Այս պահի դրությամբ հաշվառված անձանց թվաքանակը այնքան է, որ ունենք դեռեւս 16-18 ամսվա վճարելիք գումար: Հետեւաբար այսօր նոր սոցիալական խմբի մասին խոսելը ժամանակավրեպ է: Չենք ուզում երկար հերթեր լինեն»:
Հռիփսիմե ՋԵԲԵՋՅԱՆ
