ԱՄՆ նախագահ Բարաք Օբամայի՝ Ճապոնիա կատարած այցի վերաբերյալ ծավալուն անդրադարձ է կատարել Euronews լրատվականի թուրքական տարբերակը։
Ուշագրավ է, որ հոդվածագիրը կապ է հայտնաբերել ԱՄՆ նախագահի՝ Ճապոնիա կատարած այցի և Հայոց ցեղասպանության միջև։ Այսպես, 2016թ. մայիսի 27-ին սպասվում է, որ ԱՄՆ նախագահ Օբաման կայցելի Հիրոսիմա։
Ճապոնական այդ քաղաք այցելող ԱՄՆ առաջին նախագահը հայտարարել է, որ չի պատրաստվում ներողություն խնդրել 1945թ. քաղաքի վրա նետված ատոմային ռումբի համար. «Պատերազմի ընթացքում քաղաքական գործիչները կարող են կայացնել ցանկացած տեսակի որոշում։ Բոլոր առաջնորդներն էլ ստիպված են բարդ որոշումներ կայացնել՝ հատկապես պատերազմի ընթացքում»։
Օբամայի ահա այս խոսքերն են, որ անհանգստացրել են հոդվածագրին, որն էլ ԱՄՆ նախագահ Օբամայի՝ Ճապոնիա կատարած այցելության մասին անդրադարձը վերնագրել է «Օբաման մեծ դժբախտություն է համարում այսպես կոչված Հայոց ցեղասպանությունը, բայց ներողություն չի խնդրում Հիրոսիմայի համար»։
Կարդացեք նաև
Հիշեցնենք, որ 1945թ. օգոստոսի 6-ին ԱՄՆ-ն ատոմային ռումբ գցեց Հիրոսիմայի վրա, որի հետևանքով զոհվեց 140.000 մարդ։ 3 օր անց՝ օգոստոսի 9-ին ԱՄՆ-ն ևս մեկ ատոմային ռումբ գցեց արդեն Նագասակիի վրա, որի հետևանքով զոհվեց 60.000-80.000 մարդ։
