Ես իմ ամբողջ կյանքում տնտեսություն եմ ղեկավարել, միշտ պայքարել եմ հոսանքի ավելորդ ծախսի դեմ, ջրի նույնիսկ, ամեն ինչի դեմ: Պայքարել եմ, որ խնայողություններ լինեն: Երբ որ ես եկա նախարարություն, ես ջղայնանում էի, որ ցերեկը լույսերը վառ էին թողնում:
«Անարդյունավետ ծախսեր չի կարելի ասել, բայց ժամանակները փոխվում են, պահանջները փոխվում են, կրճատումներ պիտի արվի: Նախատեսում ենք ծախսերի կրճատում»,- այսօր գյուղատնտեսության նախարար Սերգո Կարապետյանը լրագրողների հետ զրույցում այսպես ներկայացրեց, թե ինչ խնայողություններ է ինքն անում նախարարությունում:
Նախարարը վստահեցրեց, որ 2011-ից, երբ սկսել է ինքը աշխատել, ծախսերը կտրուկ նվազել են. «Շատ լուրջ խնայողություններ ենք ունեցել հենց առաջին տարուց սկսած: Էսօր հասել ենք էնպիսի մակարդակի, որ գնումների հարցում էլ իջեցնելու տեղ էլ չունենք: Հետաքրքրվեք բոլորից՝ կոռուպցիոն ռիսկերը մեզ մոտ նվազագույնի են հասցված: Էնպես չի, որ մեզ մոտ կոռուպցիա կա, լրագրողական հետաքննություն անցկացրեք: Գործուղումներն էլ մեզ մոտ շատ սահմանափակ են, կարող ենք ներկայացնել»:
Սերգո Կարապետյանը վստահեցրեց, որ ինչ նախարար է դարձել՝ միայն էկոնոմ կարգով է գործուղումների գնացել՝ փոքր պատվիրակությամբ. «Ես առաջին օրվանից դա ասում եմ: Ես իմ ամբողջ կյանքում տնտեսություն եմ ղեկավարել, միշտ պայքարել եմ հոսանքի ավելորդ ծախսի դեմ, ջրի նույնիսկ, ամեն ինչի դեմ: Պայքարել եմ, որ խնայողություններ լինեն: Երբ որ ես եկա նախարարություն, ես ջղայնանում էի, որ ցերեկը լույսերը վառ էին թողնում: Ազնվությամբ, փոքր բան եմ ասում, կարող է ձեզ համար շատ տարօրինակ թվա, բայց իմ էությամբ ես էդպիսին եմ»:
Կարդացեք նաև
Հարցին՝ վերանորոգման ծախսեր չե՞ք արել՝ նախարարը վստահեցրեց. «Արել եմ՝ իմ հաշվին, տուալետներն եմ նորոգել: Միջանցքը, բանը, նկարներ կախեցի: Արել եմ իմ հաշվին, ես հլը նախարարի աշխատավարձ չէի ստացել»:
Նա ասաց, որ ծախսերը միշտ էլ սեղմելու տեղ կա: Ինչ վերաբերում է կադրային կրճատումներին՝ նա ասաց, որ թափուր տեղերը չեն լրացնի. «Ունենք ՊՈԱԿ-ներ, մարզերում ավերոդ աշխատողներ կան, պիտի կրճատել: «Հայանտառ» ՊՈԱԿ-ն ունենք, որտեղ նախատեսվում է 60 հոգի կրճատում»:
Երբ հարցրեցին՝ անտառահատումների դեպքերը բա չե՞ն շատանա՝ նախարարը կատակեց. «Ինչքան պահակներին կրճատենք՝ անտառահատումները կպակասեն»:
Հռիփսիմե ՋԵԲԵՋՅԱՆ
