Սյունիքի մարզի ընդհանուր իրավասության դատարանի դատավոր Ի. Բեգլարյանը մայիսի 17-ի դռնբաց դատական նիստում քննության է առել Գորիսի քաղաքապետի նախկին թեկնածու Տիգրան Կարապետյանի հայցն ընդդեմ Սյունիքի մարզպետի խորհրդական, ազատամարտիկ Վոլոդյա Հովհաննիսյանի եւ երրորդ անձ «Առավոտ» օրաթերթի՝ վիրավորանք հասցնելու համար լրատվության միջոցով հրապարակային ներողություն խնդրելու, զրպարտություն համարվող փաստացի տվյալները լրատվության միջոցով հերքելու պահանջի մասին:
Դատարանը որոշել է գործի վարույթը կասեցնել՝ տեղեկացնելով, որ ՀՀ պաշտպանության նախարարության Սիսիանի տարածքային զինվորական կոմիսարիատի մայիսի 17-ի թիվ 1/344 գրության համաձայն եւ ԵԿՄ Սիսիանի տարածքային բաժանմունքի նախագահի կողմից տրված տեղեկանքի համաձայն՝ պատասխանողը ապրիլի 3-ից գտնվում է Թալիշ-Մատաղիս մարտական գծի պաշտպանական հատվածում:
Դատարանի որոշման համաձայն՝ ՀՀ քաղաքացիական օրենսգրքի 105 հոդվածի 2-րդ մասը նախատեսում է գործի կասեցում, եթե պատասխանողը գտնվում է ռազմական դրության մեջ գտնվող զինված ուժերի կազմում: Ի դեպ, Վ. Հովհաննիսյանը զինված ուժերի կազմում գտնվելու մասին տեղեկացրել էր դատարանին:
Ռ. Մ.
«Առավոտ» օրաթերթ
24.05.2016
